Një studim i publikuar së fundmi ka gjetur lidhje mes ekspozimit ndaj trikloroetilenit (TCE), një kimikat industrial i përdorur për pastrimin e metaleve dhe rrobave, dhe rritjes së rrezikut për zhvillimin e sëmundjes së Parkinsonit.
TCE është i ndaluar në Bashkimin Evropian që nga viti 2016, për shkak të dyshimeve se shkakton kancer dhe defekte gjenetike, por në Shtetet e Bashkuara vazhdon të mbetet i pranishëm në ajër, tokë dhe ujë.
Sipas studimit, i botuar në revistën Neurology, njerëzit me nivelet më të larta të ekspozimit ndaj TCE kishin rreth 10% më shumë gjasa të diagnostikoheshin me Parkinson krahasuar me ata me ekspozim minimal, shkruan Euronews transmeton Gazeta Shneta.
Hulumtimi ka analizuar të dhënat e 222,000 të moshuarve të diagnostikuar me Parkinson mes viteve 2016–2018, duke i krahasuar me më shumë se 1.1 milionë persona pa sëmundjen.
“Ndërsa rritja e rrezikut ishte modeste, numri i madh i njerëzve të ekspozuar ndaj këtij kimikati e bën ndikimin e mundshëm shëndetësor shumë domethënës”, tha autorja kryesore e studimit, Brittany Krzyzanowski, nga Barrow Neurological Institute në SHBA.
Shkencëtarët zbuluan se rreziku ishte edhe më i lartë në zonat pranë tre fabrikave kryesore që lëshojnë TCE në SHBA.
Aktualisht, Parkinsoni prek rreth 10 milionë njerëz në mbarë botën dhe pritet që deri në vitin 2050 numri i rasteve të dyfishohet. Sëmundja karakterizohet nga dridhja e duarve, ngurtësimi i gjymtyrëve dhe vështirësitë me ekuilibrin e lëvizjet, ndërsa ende nuk ka një kurë../Gazeta Shneta/