Konsumimi i tepërt i kanellës mund të ndikojë në mënyrën se si trupi juaj i përthith disa ilaçe, tregojnë studime të reja.
Studimi shqyrtoi se si kanella dhe përbërësit e saj kryesorë ndikojnë në mënyrën se si trupi përpunon ilaçet, raporton The Washington Post.
Ndërsa sasi të vogla kanelle mund të ofrojnë përfitime shëndetësore, studiuesit thonë se përdorimi i saj shumë i shpeshtë ose në sasi të larta mund të çojë në ndërveprime me ilaçet.
“Ne e dimë se ekziston një potencial që cinnamaldehida të aktivizojë këta receptorë që mund të paraqesin rrezik për ndërveprimet me ilaçet”, tha studiuesi kryesor Bill Gurley.
Studiuesit simuluan tretjen për të studiuar vajin e kanellës dhe përbërësit e tij kryesorë: cinamaldehidin dhe acidin cinamik.
Ata zbuluan se të dyja mund të aktivizonin receptorët ksenobiotikë të trupit. Këta janë sensorë që ndihmojnë në kontrollin e mënyrës se si trupi përpunon ilaçet. Përdorimi i tepërt i kanellës mund të bëjë që trupi të largojë disa ilaçe shumë shpejt, duke i bërë ato më pak efektive, raportoi The Post.
Studimi nuk tha saktësisht se sa kanellë është tepër, por studiuesit paralajmëruan se format e përqendruara, si suplementet, mbartin më shumë rrezik. Ata këshillojnë pacientët të konsultohen me mjekun e tyre përpara se të përdorin suplemente kanelle ose produkte të tjera të ngjashme.
Kanella është bërë më popullore vitet e fundit, veçanërisht tek njerëzit me diabet të tipit 2.
Në fakt, një raport i vitit 2024 parashikon që tregu global i kanellës do të rritet me 412.9 milionë dollarë midis viteve 2024 dhe 2028, pjesërisht për shkak të përdorimit të saj në produktet shëndetësore dhe farmaceutike.
Nevojiten më shumë studime për të kuptuar plotësisht se si kanella mund të ndërveprojë me ilaçet.
“Kjo është ajo që mund të ndodhë, por nuk do ta dimë saktësisht se çfarë do të ndodhë derisa të bëjmë një studim klinik”, tha Gurley./Gazeta Shneta/