Pirja e duhanit shkakton tkurrje të trurit, dhe sa më shumë dhe më gjatë që një person pi duhan, aq më i madh është dëmi, sipas një studimi të ri.
Humbja e vëllimit të trurit rrit rrezikun e rënies njohëse, demencës dhe sëmundjes së Alzheimerit, shkruan burimi Medical News Today përcjell Gazeta Shneta.
Autorët e studimit rekomandojnë që kushdo në çdo moshë që pi duhan duhet t’i japë përparësi lënies së duhanit.
Tkurrja e trurit shoqërohet gjithashtu me një rrezik në rritje të dëmtimit njohës, demencës dhe sëmundjes së Alzheimerit (AD).
Rezultatet e studimit tregojnë se lënia e duhanit në çdo kohë ndaloi humbjen e mëtejshme të lëndës gri. Megjithatë, truri nuk e rikuperon masën e tij origjinale pasi të ndodhë tkurrja.
Prej kohësh dihet se pirja e duhanit është e dëmshme për mushkëritë dhe zemrën, megjithëse jo aq shumë kërkime i janë kushtuar efektit të tij në tru.
Ekipi hulumtues, i udhëhequr nga autorja Dr. Laura J. Bierut, drejtore e Qendrës Kërkimore të Shëndetit dhe Sjelljes në WashUMed, synoi të mbushte një boshllëk në kuptimin aktual të efekteve të dëmshme të pirjes së duhanit.
Hulumtimet e mëparshme kanë treguar se duhanpirësit kanë më shumë gjasa të zhvillojnë demencë. Është vlerësuar se 14% e rasteve të Alzheimerit mund t’i atribuohen pirjes së duhanit.
Hetimi i lidhjes midis tkurrjes së trurit dhe pirjes së duhanit kërkon zbërthim të faktorëve të sjelljes dhe atyre gjenetike.
Tkurrja e trurit dhe dëshira për të pirë duhan mund të ndikohen nga gjenet e dikujt – autorët thonë se rreth gjysma e preferencës së dikujt për pirjen e duhanit është për shkak të gjenetikës.
Studiuesit morën parasysh faktorë si predispozicioni gjenetik për pirjen e duhanit, duhanpirjen dhe vëllimin e trurit. Ata arritën në përfundimin se gjenetika mund të çojë në pirjen e duhanit, por se pirja e duhanit nxit ndjeshëm tkurrjen e trurit.
Studimi analizon të dhënat e lëshuara në vitin 2019 nga Biobank në Mbretërinë e Bashkuar dhe përfshin 32,094 pjesëmarrës me origjinë evropiane, së bashku me të dhënat e tyre të imazhit të trurit. Pjesëmarrësit vetë-raportuan pirjen e duhanit.
Dr. Dung Trinh nga Kalifornia, tha për Medical News Today se: “Tkurrja e trurit, ose atrofia, përfshin humbjen e neuroneve dhe lidhjeve ndërmjet tyre”.
“Kjo humbje mund të dëmtojë aftësinë e trurit për të funksionuar siç duhet,” tha Dr. Trinh.
Dr. Trinh vuri në dukje se në kushte të tilla si sëmundja e Alzheimerit dhe demenca në përgjithësi, disa zona kritike tkurren, duke rezultuar në një humbje të funksionit.
“Për shembull, hipokampusi, është vendimtar për formimin e kujtesës, shpesh tregon atrofi të konsiderueshme në sëmundjen e Alzheimerit,” vuri në dukje ai.
Një atrofi e tillë mund të pengojë komunikimin midis rajoneve të ndryshme të trurit, duke rezultuar në rënie njohëse.
Mes tjerash, studiuesit theksuan se ulja e vëllimit të trurit lidhet me plakjen. “Me fjalë të tjera, njerëzit që pinë duhan kanë një tru “të vjetër”.
Gjetjet e studimit u botuan së fundmi në “Biological Psychiatry: Global Open Science”. /Gazeta Shneta/