Shkencëtarët po ndajnë njohuri se si vitamina D mund të ndihmojë në rastet e rënda të COVID-19 duke zbuluar se si funksionon vitamina për të reduktuar hiper-inflamacionin e shkaktuar nga qelizat imune në mushkëri.
Një studim i ri i përbashkët nga Universiteti Purdue dhe Instituti Kombëtar i Shëndetit (NIH), tregon se si një metabolit aktiv i vitaminës D – (jo një formë e shitur OTC) – përfshihet në “fikjen” e inflamacionit në trup gjatë infeksioneve të tilla si COVID-19, shkruan Medical News Today përcjell Gazeta Shneta.
“Meqenëse inflamacioni në rastet e rënda të COVID-19 është një arsye kryesore për sëmundshmërinë dhe vdekshmërinë, ne vendosëm të hedhim një vështrim më të afërt në qelizat e mushkërive nga pacientët me COVID-19,” thanë autorët kryesorë Dr. Behdad (Ben) Afzali, dhe Dr. Majid Kazemian nga Universitetin Purdue.
Si pjesë e studimit, hulumtuesit analizuan qelizat individuale të mushkërive nga tetë persona me COVID-19.
Ata zbuluan se në këto qeliza, një pjesë e përgjigjes imune ndaj SARS-CoV-2 – virusi që shkakton COVID-19 – po shkonte në mbingarkesë dhe përkeqësonte inflamacionin në mushkëri.
Pas administrimit të vitaminës D në eksperimentet me epruvetë, ata vunë re ulje të inflamacionit të qelizave të mushkërive.
Më pas ata hulumtuan më tej se si vitamina e arriti këtë rezultat.
Ata e bënë këtë duke iu drejtuar qelizave ndihmëse T – të njohura gjithashtu si CD4 + – të cilat janë një lloj qelize imune që stimulojnë qelizat T “vrasëse” dhe qelizat e tjera të bardha të gjakut për të ngritur një përgjigje imune.
Qelizat T dihet se luajnë një rol të madh në rastet e rënda dhe të rrezikshme të COVID-19 duke shkuar në mbingarkesë dhe duke çuar në një fenomen shpesh fatal të njohur si një stuhi citokine.
Shkencëtarët zbuluan se në infeksionet normale, qelizat Th1, të cilat janë një nëngrup i qelizave T ndihmëse që luftojnë mikrobet brenda qelizës, kalojnë një fazë pro-inflamatore. Gjatë kësaj faze, trupi pastron infeksionin. Menjëherë pas kësaj, sistemi mbyllet për të kaluar në fazën anti-inflamatore.
Shkencëtarët zbuluan se vitamina D është thelbësore në përshpejtimin e këtij tranzicioni.
“Ne zbuluam se në qelizat T të shëndetshme, aktivizimi i programit të gjenit inflamator përkoi me aktivizimin e një sistemi të vitaminës D brenda këtyre qelizave. Prandaj, ne hetuam se si funksionon ky sistem i vitaminës D dhe çfarë bën ai për qelizat T të shëndetshme përpara se të përpiqeshim ta lidhnim atë me COVID-19, ” thanë Dr. Afzali dhe Dr. Kazemian për Medical News Today.
Ndërsa në infeksionet COVID-19, shkencëtarët panë që faza pro-inflamatore e qelizave Th1 nuk fiket. Ata ia atribuuan këtë ose mungesës së vitaminës D ose një anomalie në përgjigjen e qelizave ndaj vitaminës D.
“Tradicionalisht vitamina D është menduar se varet nga veshkat për ta aktivizuar atë përpara se të bëhet funksionale. Ne zbuluam se qelizat T kishin një sistem të pavarur për të aktivizuar plotësisht dhe për t’iu përgjigjur vitaminës D, pavarësisht nga veshkat”, thanë ata.
Studiuesit supozuan se shtimi i një metaboliti intravenoz shumë të koncentruar të vitaminës D në trajtimet ekzistuese mund të ndihmojë më tej njerëzit të shërohen nga COVID-19. Por ata ende nuk e kanë testuar këtë teori në provat klinike. /Gazeta Shneta/