Në një studim mbi jetëgjatësinë tek gratë, studiuesit nga Universiteti i Kalifornisë në San Diego (UCSD) shqyrtuan përfitimet e mbajtjes së një peshe të qëndrueshme për gratë e moshuara.
Shkencëtarët studiuan të dhënat nga mijëra gra për të përcaktuar mundësinë e arritjes së moshës 90, 95 ose 100 vjeç, të cilën ata e quajtën “jetegjatësi të jashtëzakonshme”, shkruan Medical News Today përcjell Gazeta Shneta.
Analiza e të dhënave të tyre tregoi se gratë e moshuara që mbanin një peshë të qëndrueshme mund të kenë 1.2 deri në 2 herë më shumë gjasa të arrijnë moshën 90 deri në 100 vjeç.
Gratë e moshuara që kërkojnë të zgjasin jetëgjatësinë e tyre deri në moshën 90 vjeç ose më shumë duhet të përqendrohen në ruajtjen e një peshe të qëndrueshme.
Studimi përfshiu 54,437 gra nga Iniciativa për Shëndetin e Grave. Studiuesit shikuan ndryshimet afatshkurtra dhe afatgjata të peshës tek gratë dhe e krahasuan atë me moshën që arritën.
Studiuesit zbuluan se gratë që përjetuan humbje të paqëllimshme në peshë kishin 51% shanse më të ulëta për të arritur në 90.
Ndërsa humbja e peshës u shoqërua me ulje të jetëgjatësisë, një shtim në peshë prej 5% ose më shumë nuk kontribuoi në jetëgjatësinë e jashtëzakonshme, gjë që tregon rëndësinë e mbajtjes së një peshe të qëndrueshme.
Studimi u botua në “Journal of Gerontology: Medical Sciences”. /Gazeta Shneta/