Sindroma e vezores policistike mund të rrisë rrezikun e problemeve me kujtesën dhe të menduarit në moshën e mesme, sugjeron një studim i ri.
Sindroma e vezores policistike (PCOS) është një çrregullim hormonal që prek deri në 10% të grave dhe ka qenë i lidhur me obezitetin, diabetin dhe problemet e zemrës, shkruan burimi Health News përcjell Gazeta Shneta.
Ndërsa dihet më pak se si gjendja ndikon në tru, një studim i ri i botuar në revistën “Neurology”, sugjeron se mund të dëmtojë kujtesën dhe të çojë në plakjen e hershme të trurit.
Studimi përfshiu 907 pjesëmarrëse femra të cilat ishin 18 deri në 30 vjeç në fillim të periudhës së studimit. Prej tyre, 66 pjesëmarrës kishin sindromën e vezores policistike.
Diagnoza, megjithatë, nuk u bë nga një mjek, por bazohej në nivelet e androgjenit dhe simptomat e vetë-raportuara. Kjo do të thotë që pjesëmarrëset mund të mos i kenë mbajtur mend të gjitha informacionet me saktësi.
Gjatë ndjekjes 30-vjeçare, pjesëmarrëset përfunduan teste për të matur kujtesën, aftësitë verbale, shpejtësinë e përpunimit të informacioneve dhe vëmendjen.
Në një test që mat vëmendjen, femrat me sindromën e vezores policistike kishin një rezultat mesatarisht 11% më të ulët në krahasim me femrat pa këtë gjendje.
Pas përshtatjes për moshën, racën dhe arsimin, studiuesit zbuluan se femrat me sindromën e vezores policistike kishin rezultate më të ulëta në testet që matnin kujtesën, vëmendjen dhe aftësitë verbale sesa ato pa këtë gjendje.
Cilat janë simptomat e sindromës së vezores policistike?
Shkaku i saktë i sindromës së vezores policistike nuk dihet, por nivelet e rritura të androgjenit – një hormon seksual mashkullor – luajnë një rol të rëndësishëm në zhvillimin e gjendjes.
Ndërsa sindroma e vezores policistike diskutohet më shpesh në kontekstin e infertilitetit, gjendja mund të ketë implikime shumë më të gjera shëndetësore.
Femrat me sindromën e vezores policistike shpesh janë rezistent ndaj insulinës, gjë që i vendos ato në një rrezik më të lartë të diabetit.
Më shumë se gjysma e pacienteve me sindromën e vezores policistike zhvillojnë diabetin e tipit 2 deri në moshën 40 vjeç. Për më tepër, ato kanë më shumë gjasa të zhvillojnë diabetin gestacional (diabeti gjatë shtatzënisë), i cili mund të shkaktojë probleme si për nënën ashtu edhe për foshnjën.
Sindroma e vezores policistike është gjithashtu e lidhur me një rrezik të lartë të sëmundjeve të zemrës, presionit të lartë të gjakut dhe niveleve të larta të kolesterolit LDL (“i keq”).
Simptomat e sindromës së vezores policistike mund të përfshijnë si më poshtë:
– Menstruacione të rënda, të gjata, të parregullta ose të munguara.
– Steriliteti
– Akne ose lëkurë të yndyrshme.
– Qime të tepërta në fytyrë ose trup.
– Rrallimi i flokëve ose tullaci i tipit mashkullor.
– Shtim në peshë, veçanërisht rreth barkut.
– Ciste të shumta të vogla në vezore.
Ndërsa studimi nuk provon se sindroma e vezores policistike shkakton rënie njohëse, autorët rekomandojnë femrat me këtë gjendje të përfshijnë më shumë ushtrime kardiovaskulare dhe të përmirësojnë shëndetin mendor për të ngadalësuar plakjen e trurit. /Gazeta Shneta/