Lëvizja Vetëvendosje e ka emëruar Driton Velën anëtar të Këshillit Shtetëror të Cilësisë me 57 vota për.
Ministri i Arsimit Hajrulla Çeku i ka dal në mbrojtje Velës duke thënë se Vela ka qenë kandidat për deputet nga LVV në vitin 2019, ndërsa nuk ka mbajtur post politik në tre vitet e fundit siç e parasheh ligji.
Por opozita e ka kritikuar ashpër propozimin dhe emërimin e Velës në këtë post duke e quajtur kapje të pushtetit.
“Si mundeni të sillni një emër të tillë?…PDK jo që nuk e voton, por do ta luftojë çdo herë politizimin e arsimit në Kosovë….Kjo është për turp,” tha Sala Jashari nga PDK.
Deputeti i LDK-së Armend Zemaj ka thënë se lidhja e LVV-së me Driton Velën nuk është vetëm kandidatura e tij për deputet, por edhe emërimi i tij në Komitetin e Listës Esenciale të Barnave, që sipas tij kishte mundësuar krijimin e monopolit të barnave për një kompani farmaceutike.
Mos emërimin e Velës në KShC e ka kundërshtuar edhe organizata ORCA sipas së cilës ai përveç që ka qenë kandidat për deputet, sipas tyre, edhe kishte deklaruar të dhëna të pasakta në rolin e tij akademik.
“Në këtë proces është rikthyer edhe emri i Driton Velës, ish kandidat për deputet nga radhët e Lëvizjes Vetëvendosje në zgjedhjet parlamentare të vitit 2019. Driton Vela në vitin 2023 ishte diskualifikuar nga një proces i ngjashëm për shkak të deklarimeve të pasakta në aplikim, konkretisht për pretendimin se kishte rol akademik si bartës i programi në Universitetin e Prishtinës dhe për paraqitje të pasakta të përvojës së tij akademike. Në tetor të vitit 2025, ai u përfshi në një incident publik me sjellje joakademike gjatë një mbledhjeje të Këshillit të Fakultetit të Mjekësisë, ndërsa në shkurt të vitit 2026 i është shqiptuar vërejtje me shkrim nga Universiteti i Prishtinës për cenim të imazhit institucional. Pavarësisht këtij historiku, ai është rekomanduar sërish për një pozitë vendimmarrëse në këtë institucion”, thuhet në reagimin e ORCA-së. /Gazeta Shneta/