Gjendja ekonomike e familjes ka një ndikim shumë më të madh në zhvillimin e trurit të fëmijëve sesa mendohej më parë, sipas një studimi të ri që po sfidon disa prej bindjeve tradicionale mbi inteligjencën dhe suksesin në jetë.
Hulumtimi, i realizuar nga studiues të Universitetit të Uashingtonit në Shtetet e Bashkuara, zbuloi se faktorët socio-ekonomikë shpjegojnë rreth 16 për qind të ndryshimeve në funksionimin e trurit të fëmijëve. Ky ndikim rezultoi më i madh se ai i koeficientit të inteligjencës (IQ), stilit të prindërimit apo historisë shëndetësore, shkruan Euronews transmeton Gazeta Shneta.
Studiuesit analizuan të dhënat e rreth 12 mijë fëmijëve të moshës 9 deri në 10 vjeç, duke shqyrtuar qindra faktorë që lidhen me mjedisin, shëndetin dhe aktivitetet e tyre të përditshme.
Sipas rezultateve, kushtet e lagjes ku rritet një fëmijë dhe gjendja financiare e familjes janë ndër faktorët më të rëndësishëm që ndikojnë në zhvillimin e trurit. Këto elemente lidhen veçanërisht me zonat cerebrale përgjegjëse për funksionet motorike dhe shqisore, të cilat janë shumë të ndjeshme ndaj mungesës së gjumit dhe stresit kronik.
“Truri i një fëmije që rritet në varfëri i ngjan trurit të një fëmije nga një familje më e pasur që është i privuar nga gjumi dhe nën stres të vazhdueshëm”, tha autori kryesor i studimit, Nico Dosenbach.
Studiuesit theksojnë se kjo nuk do të thotë se fëmijët nga familjet me të ardhura të ulëta janë më pak inteligjentë. Përkundrazi, mjedisi, stresi dhe cilësia e gjumit duket se formësojnë zhvillimin e trurit në mënyra që shpesh janë interpretuar gabimisht si dallime në inteligjencë.
Sipas UNICEF-it, rreth 900 milionë fëmijë në mbarë botën jetojnë në varfëri shumëdimensionale, pa qasje të mjaftueshme në ushqim, arsim, kujdes shëndetësor apo strehim. Studiuesit thonë se investimi në mirëqenien sociale të familjeve mund të ketë ndikim të drejtpërdrejtë në zhvillimin dhe potencialin e brezave të ardhshëm. /Gazeta Shneta/