Një vaksinë kundër gripit që administrohet përmes hundës mund të ofrojë përfitime imunitare më të mëdha sesa mendohej deri më tani, sugjeron një studim i ri i shkencëtarëve nga Instituti La Jolla për Imunologji në Kaliforni.
Hulumtimi, i publikuar në revistën “Science Translational Medicine”, tregon se vaksina nazale FluMist mund të krijojë një “kujtesë imunitare” afatgjatë në rrugët e frymëmarrjes, duke forcuar mbrojtjen pikërisht në vendin ku virusi i gripit hyn në organizëm.
Për dekada me radhë, efektiviteti i vaksinave kundër gripit është vlerësuar kryesisht në bazë të antitrupave që krijohen në gjak. Megjithatë, studiuesit theksojnë se virusi i gripit fillimisht sulmon qelizat në hundë dhe në rrugët e sipërme të frymëmarrjes, ndaj mbrojtja lokale mund të jetë po aq e rëndësishme.
Në studim u krahasuan përgjigjet imunitare të 25 personave që morën vaksinën nazale FluMist dhe 25 të tjerëve që morën vaksinën tradicionale me injeksion.
Rezultatet treguan se vaksina me injeksion prodhoi nivele të larta antitrupash në gjak, ndërsa FluMist nxiti një rritje të konsiderueshme të qelizave B të memories në hundë dhe rrugët e sipërme të frymëmarrjes. Këto qeliza, të cilat luajnë rol kyç në njohjen dhe luftimin e virusit, vazhduan të jenë të pranishme edhe gjashtë muaj pas vaksinimit.
Sipas autorëve të studimit, këto qeliza nuk u identifikuan te personat që morën vaksinën tradicionale kundër gripit, duke sugjeruar se vaksina nazale mund të aktivizojë një lloj mbrojtjeje që nuk matet përmes analizave standarde të gjakut.
“Përmirësimi i kujtesës imunitare në mukozën e rrugëve të frymëmarrjes përfaqëson një strategji premtuese për zhvillimin e vaksinave më efektive kundër gripit dhe viruseve të tjera respiratore”, theksojnë studiuesit.
FluMist është vaksina e vetme nazale kundër gripit e miratuar në Shtetet e Bashkuara dhe përdoret prej më shumë se dy dekadash. Në vitin 2025, autoritetet amerikane miratuan edhe administrimin e saj në shtëpi nga vetë pacienti ose nga një kujdestar. Vaksina është e aprovuar për personat nga mosha 2 deri në 49 vjeç.
Ekspertët besojnë se gjetjet e reja mund të ndihmojnë në zhvillimin e gjeneratës së ardhshme të vaksinave kundër gripit, COVID-19 dhe sëmundjeve të tjera respiratore, duke synuar forcimin e mbrojtjes në vendin ku infeksionet fillojnë.