Një studim i ri ka zbuluar se disa lloje mushkonjash mund të zhvillojnë një sjellje të papritur ndaj repelentit DEET, përbërësi më i përdorur në produktet kundër insekteve. Sipas studiuesve, mushkonjat mund të mësojnë ta lidhin aromën e DEET me një burim ushqimi, duke ndryshuar mënyrën se si reagojnë ndaj tij.
Hulumtimi u përqendrua tek mushkonja “Aedes aegypti“, e njohur për përhapjen e sëmundjeve të rrezikshme si ethet e verdha, dengue, Zika dhe chikungunya. Në eksperimentet laboratorike, shkencëtarët përdorën një metodë të ngjashme me kushtëzimin klasik të përshkruar nga fiziologu rus Ivan Pavlov, shkruan burimi Medical News Today transmeton Gazeta Shneta.
Mushkonjave iu ofrua një burim gjaku i ngrohtë për t’u ushqyer dhe, në të njëjtën kohë, u ekspozuan ndaj aromës së DEET. Pas përsëritjes së procesit katër herë, më shumë se 60% e insekteve tentuan të ushqeheshin kur ndjenin vetëm aromën e DEET, edhe pa praninë e gjakut.
Për të testuar nëse kjo ndikonte në preferencat e tyre, studiuesit u ofruan mushkonjave zgjedhjen mes dy duarve njerëzore: njërës të trajtuar me DEET dhe tjetrës jo. Mushkonjat e patrainuara shmangën dorën me repelent, ndërsa ato që kishin krijuar lidhjen mes aromës dhe ushqimit u tërhoqën prej saj.
Megjithatë, ekspertët theksojnë se këto rezultate nuk nënkuptojnë se DEET ka humbur efektivitetin.
Përkundrazi, ai mbetet një nga mjetet më të sigurta dhe më efikase për mbrojtjen nga pickimet e mushkonjave. Studimi sugjeron vetëm se ruajtja e një niveli të qëndrueshëm të repelentit, përmes riaplikimit të rregullt, mund të jetë e rëndësishme për të shmangur përshtatjen e insekteve ndaj përqendrimeve më të ulëta të tij. /Gazeta Shneta/