Një studim i ri evropian ka treguar se ilaçi imunomodulator i njohur anti-thymocyte globulin (ATG), në një dozë shumë më të ulët se sa ishte përdorur më parë, është i sigurt dhe efektiv në ndalimin e përparimit të diabetit tip 1 (T1D) te fëmijët dhe të rinjtë.
Studimi u prezantua në Takimin Vjetor të Shoqatës Evropiane për Studimin e Diabetit (EASD) dhe u publikua në të njëjtën kohë në revistën The Lancet, shkruan MedicalXpress transmeton Gazeta Shneta.
Triali MELD-ATG përfshiu pjesëmarrës nga 14 spitale në tetë vende evropiane, me të rinj të moshës 5–25 vjeç të sapodiagnostikuar me T1D.
Rezultatet treguan se një dozë 0.5 mg/kg ishte po aq efektive sa doza më e lartë 2.5 mg/kg, por me shumë më pak efekte anësore, duke përfshirë sindromën e lirimit të citokinave dhe sëmundjen serike.
Studiuesit theksuan se kjo dozë e ulët mund të jepet vetëm një ditë, në vend të dy ditëve me dozën më të lartë, dhe është e përballueshme në shumicën e vendeve.
Profesor Chantal Mathieu, udhëheqëse e studimit, theksoi se kjo qasje mund të ndalojë ose të ngadalësojë humbjen e qelizave beta prodhuese të insulinës te të rinjtë me T1D të sapodiagnostikuar, duke ofruar një mundësi të sigurt dhe efektive për trajtim të hershëm.
Studiuesit shpresojnë që kjo të hapë rrugën për përdorimin më të gjerë të ATG si trajtim modifikues i sëmundjes te fëmijët dhe adoleshentët, duke reduktuar nevojën për injeksione të shumta dhe duke përmirësuar cilësinë e jetës së pacientëve./Gazeta Shneta/