Të dhënat shëndetësore të rreth 500 mijë qytetarëve në Mbretërinë e Bashkuar janë vjedhur dhe janë nxjerrë në shitje në platformën kineze Alibaba, duke ngritur shqetësime serioze për sigurinë e informacionit mjekësor.
Rasti është konfirmuar nga ministri britanik i teknologjisë, Ian Murray, i cili bëri të ditur se të dhënat i përkasin pjesëmarrësve të UK Biobank – një nga databazat më të mëdha në botë për informacione biologjike, shëndetësore dhe të stilit të jetesës.
Sipas autoriteteve, më 20 prill organizata kishte njoftuar qeverinë se disa shitës në platformat e Alibaba-s kishin listuar për shitje të dhëna që pretendohej se i përkisnin kësaj databaze. Të paktën një nga këto lista dyshohet se përmbante informacion për të gjithë 500 mijë vullnetarët.
Megjithatë, zyrtarët theksojnë se të dhënat e rrjedhura nuk përfshijnë informacione identifikuese si emra, adresa apo numra telefoni.
Autoritetet britanike kanë bërë të ditur se nuk ka prova që këto të dhëna janë blerë para se listimet të hiqeshin nga platforma. Qeveria britanike ka qenë në kontakt me autoritetet kineze dhe me kompaninë për të siguruar largimin e menjëhershëm të përmbajtjes.
Ndërkohë, drejtori ekzekutiv i UK Biobank, Rory Collins, ka kërkuar falje për shqetësimin e shkaktuar dhe ka siguruar pjesëmarrësit se informacionet personale mbeten të sigurta.
Si masë paraprake, organizata ka pezulluar përkohësisht qasjen në platformën e saj kërkimore dhe ka paralajmëruar masa të reja sigurie, përfshirë kufizimin e madhësisë së skedarëve që mund të shkarkohen.
Rasti ka rikthyer në vëmendje rreziqet në rritje të sigurisë kibernetike, veçanërisht kur bëhet fjalë për të dhëna të ndjeshme shëndetësore që përdoren në kërkime shkencore në shkallë globale.