Kompania farmaceutike zvicerane Roche ka marrë miratimin evropian për një test të ri gjaku që ndihmon në zbulimin dhe përjashtimin e sëmundjes së Alzheimerit. Ky test konsiderohet një alternativë më e thjeshtë dhe më pak invazive krahasuar me metodat aktuale të diagnostikimit, si skanimet e trurit apo analizat e lëngut spinal.
Testi i quajtur “Elecsys pTau217”, është zhvilluar në bashkëpunim me kompaninë Eli Lilly dhe ka marrë certifikimin CE, i cili konfirmon sigurinë dhe efektivitetin e tij për përdorim në Bashkimin Evropian, raporton Euronews Health transmeton Gazeta Shneta.
Sipas Roche, ky është testi i parë i gjakut që mund të sinjalizojë dhe njëkohësisht të ndihmojë në përjashtimin e Alzheimerit në fazat e hershme.
Ekspertët thonë se diagnoza e hershme është shumë e rëndësishme për trajtimin dhe menaxhimin e sëmundjes.
Aktualisht, shumë pacientë kalojnë një proces të gjatë dhe të kushtueshëm deri në marrjen e një diagnoze të saktë.
Përdorimi i një testi të thjeshtë gjaku mund të lehtësojë punën e mjekëve dhe të ndihmojë pacientët të marrin trajtim më shpejt.
Testi funksionon duke matur nivelin e proteinës pTau217 në gjak.
Nivelet e larta të kësaj proteine lidhen me praninë e pllakave amiloide në tru, të cilat janë karakteristike për Alzheimerin. Nëse rezultati është negativ, mund të shmangen ekzaminime të tjera më të ndërlikuara dhe invazive.
Alzheimeri është forma më e zakonshme e demencës dhe përbën 60 deri në 80% të rasteve.
Numri i personave me demencë në Evropë pritet të rritet ndjeshëm në dekadat e ardhshme, duke e bërë diagnostikimin e hershëm edhe më të rëndësishëm për sistemet shëndetësore dhe familjet e prekura.
/Gazeta Shneta/