Një tragjedi ka ndodhur në Friuli të Italisë, atje ku një 22-vjeçar shqiptar ka humbur jetën gjatë punës në fabrikë.
Viktimë mbeti Daniel Tafa. I riu punonte me një makineri për stampimin e ingranazheve industriale, kur një kallëp i nxehtë metali ka shpërthyer dhe një copë e ka goditur 22-vjeçarin në shpinë. I ndjeri ka humbur jetën në vendin e ngjarjes.
Një prej kolegëve të tij tregoi për median vendase.
“Ishte vendosur një copë në presë për të kryer një testim. Nuk e di se çfarë ndodhi por kjo pjesë doli nga vendi dhe e goditi”, transmeton voxnews.al.
Danieli kishte festuar ditëlindjen e 22-të më 24 mars, ndërsa pak orë më vonë kishte shkuar në punë, në turnin e natës.
Për ngjarjen ka nisur hetimi, për të zbuluar nëse shkak i incidentit ka qenë mosfunksionimi i makinerisë apo një gabim njerëzor.
Pak ditë më parë një tjetër shqiptar, po në moshë të re, ndërroi jetë gjatë punës në një fermë. 31-vjeçari i quajtur Gentjan po ngiste një traktor kur për arsye të paqarta mjeti ra në një kanal dhe u përmbys, duke zënë përfund të riun.