Një trajtim i ri hormonal përmirësoi funksionin njohës të gjashtë burrave me Sindromën Down me 10-30 për qind, thanë shkencëtarët duke shtuar se rezultatet “premtuese” mund të rrisin shpresat për përmirësimin e cilësisë së jetës së pacientëve.
Megjithatë, shkencëtarët theksuan se studimi i vogël nuk tregonte drejt një kure për çrregullimet njohëse të personave me Sindromën Down dhe se nevojiten shumë më tepër kërkime, shkruan MedicalxPress përcjell Gazeta Shneta.
“Eksperimenti është shumë i kënaqshëm, edhe nëse qëndrojmë të kujdesshëm”, tha Nelly Pitteloud nga Spitali Universitar i Lozanës në Zvicër dhe bashkëautor i një studimi të ri në revistën Science.
Sipas Organizatës Botërore të Shëndetësisë, Sindroma Down është forma më e zakonshme gjenetike e paaftësisë intelektuale, që ndodh në rreth një në 1000 njerëz.
Zbulimet e fundit kanë sugjeruar se mënyra se si hormoni çlirues i gonadotropinës (GnRH) prodhohet në tru, mund të ndikojë në funksionimin kognitiv si kujtesa, gjuha dhe të mësuarit.
Hormonet GnRH rregullojnë sasinë e testosteronit dhe estrogjenit që prodhohet dhe nivelet e rritura të tij ndihmojnë në nxitjen e pubertetit.
“Ne pyesim veten nëse ky hormon mund të luajë ndonjë rol në vendosjen e simptomave të njerëzve me Sindromën Down,” tha Vincent Prevot, bashkëautor i studimit dhe kreu i hulumtimeve të neuroshkencës në institutin francez INSERM.
Hulumtimi i minjve
Ekipi fillimisht zbuloi se pesë vargje të mikroARN-së që rregullonin prodhimin e hormonit GnRH ishin jofunksionale te minjtë e krijuar posaçërisht për kërkimin e Sindromës Down.
Ata më pas treguan se mangësitë njohëse – si dhe humbja e nuhatjes, një simptomë e zakonshme e Sindromës Down – ishin të lidhura me sekretimin jofunksional të GnRH tek minjtë.
Ekipi më pas u dha minjve një medikament të hormonit GnRH të përdorur për të trajtuar testosteronin e ulët dhe pubertetin e vonuar te njerëzit, duke zbuluar se ai rivendoste disa funksione njohëse dhe shqisën e nuhatjes.
Një pilot studim u krye në Zvicër duke përfshirë shtatë burra me Sindromën Down të moshës 20 deri në 50 vjeç.
Gjatë trajtimit u kryen testet e njohjes dhe nuhatjes, si dhe skanimet MRI.
Gjashtë nga shtatë burrat treguan përmirësim në njohje pa efekte anësore domethënëse – megjithatë asnjëri nuk tregoi një ndryshim në shqisën e nuhatjes.
“Ne kemi parë një përmirësim prej 10-30 për qind në funksionet njohëse, veçanërisht me funksionin vizual-hapësinor, përfaqësimin tredimensional, të kuptuarit e udhëzimeve si dhe vëmendjen,” tha autori Pitteloud. /Gazeta Shneta/