Nëna Kosovare Spahiu rrëfen se si nisi t’i dhurojë flokët e tri vajzave të tyre Agneses, Drioles dhe Ariones, për fëmijët e sëmurë me kancer
Agnesa 13 vjeç, Driola 11 dhe Ariona 8, janë tri vajzat me prejardhje nga Kosova por që jetojnë në Gjermani, të cilat tash e sa kohë dhurojnë flokët e tyre për fondacionin “Deutsche Kinder krebs Hilfe”, për fëmijët që vuajnë nga sëmundjet e kancerit.
Në një bisedë për Indeksonline, nëna e tyre Kosovare Spahiu- Sahiti tregon se nga i erdhi ideja për dhurimin e flokëve.
“Fillimisht kam dëgjuar nga motra ime që është frizere, ajo tha që ishte një aksion që frizeret që i prejnë flokët t’i dhurojnë për bamirësi, që do të thotë se flokët e tyre bëhen peruke. Vajzat e mia pasie dëgjuan këtë bisedë mes meje dhe motres shprehen dëshirë që t’i dhurojnë. Flokët e tyre duhet të ishin pa ngjyra, pa kemikale dhe së paku 30 centimetra të gjata”, ka thënë ajo gjatë bisedës.
Kosovarja thotë se mundohet që një gjë të tillë ta praktikojë sa më shpesh që mundet.
“Motra ime i mbledh flokët i zenë kocel dhe i dërgon në Munchen. Ne do të vazhdojmë ta praktikojmë t’i dhurojmë flokët së paku një herë në vit sepse këtu varet edhe nga vullneti i Zotit, aq sa do t’iu rriten”, ka treguar Kosovarja
“Mendoj se çdo vajzë do të duhej të vepronte kështu, dhe do të ishte mirë që një aksion i tillë të praktikohet edhe në Kosovë, është bamirësi që i bën të lumtur shumë njerëz të tjerë, t’i bëjmë të lumtur e t’ua kthejmë buzëqeshjen sado pak”, thotë Spahiu- Sahiti.
Kosovarja thotë se është në biseda edhe me disa frizerka nga Kosova, kjo me qëllim që floket e vajzave të saj të jepen për fëmijët e sëmurë nga Kosova.