Sot, Ministri i Shëndetësisë, Uran Ismaili, bashkë me drejtorin e Shërbimit Klinik Universitar Spitalor të Kosovës, Dr. Basri Sejdiu, përuruan instalimin e CT’së së re në Klinikën e Neurologjisë.
Kjo tomografi e kompjuterizuar, 16 shtresore, pritet t’i hyjë shumë në punë kësaj klinike, teksa pritet të jetë edhe pjesë e Qendrës Kombëtare për, siç u shprehën përuruesit, ‘Stroke Center’, shkruan Gazeta Shneta.
Por, as Ismaili e as Dr. Sejdiu nuk përmendën ata që realizuan këtë projekt. CT’ja e instaluar sot është donacion i Qeverisë së Japonisë.
Ky donacion është ‘thithur’ nga SHSKUK’ja pas një takimi që Sejdiu kishte me zyrtarë nga Qeveria e Japonisë në prill të këtij viti.
Këto klinika të QKUK-së do të përfitojnë pajisje nga donacioni i Japonisë
Donacioni përfshinte 1.1 milion euro pajisje mjekësore që do të dhuroheshin për klinika të ndryshme, përfshirë atë të Neurologjisë e cila u pajisë me CT dhe ultrazë dopler për ekzaminime neurologjike.
Ndryshe, kompletimi i qendrës për trajtimin e sulmeve në tru pritet të jetë shumë i shpejtë sipas Dr. Sejdiut.
Drejtori i Klinikës së Neurologjisë, Nexhmedin Shala, ka thënë se ky projekt është jetik për qytetarët e vendit. /Gazeta Shneta/