Shteti i Kosovës ua ka borxh mbi 25 milionë Euro spitaleve turke për trajtimin e pacientëve. E derisa të paguhet ky borxh, shteti i Turqisë nuk do të trajtojë falas pacientë kosovarë
Fondi i Sigurimeve Shëndetësore ua ka borxh mbi 25 milionë Euro spitaleve turke ku janë trajtuar pacientët në kuadër të programit për Trajtimin e Pacientëve Jashtë Institucioneve Publike, shkruan Gazeta Shneta.
Madje pa u paguar ky borxh, shteti i Turqisë nuk do të pranojë më pacientë për trajtim falas.
Këtë e ka konfirmuar edhe vet ministri i Shëndetësisë Rifat Latifi. Ai ka thënë se gjatë takimit me homologun e tij në Turqi Fahretin Koca, i ka kërkuar që të vazhdohet programi për trajtimin falas të pacientëve kosovarë, por Koca ka kërkuar që paraprakisht të paguhet borxhi.
“I kam kërkuar që të vazhdohet trajtimi i pacientëve nga Kosova. Më tha ju duheni një herë të na paguani borxhin prej 25 milionë Euro”, ka deklaruar Latifi gjatë një tryeze të mbajtur me drejtuesit e SHSKUK-së.
Gazeta ka kërkuar një qëndrim edhe nga ministria turke e Shëndetësisë, por të njëjtit nuk kanë kthyer përgjigje prej më shumë se një jave.
Nga ky program vitin e kaluar janë trajtuar vetëm 17 pacientë, në vitet 2020: 33 pacientë; 2019: 100 pacientë; 2018: 64 pacientë.
Në anën tjetër sipas kryesueses së Bordit Ekzekutiv të programit për Trajtim Jashtë vendit, Kadrije Sherifi, ka thënë se 666 lëndë kanë qenë në pritje për shqyrtim nga viti 2019 dhe për të njëjtat nevojiten mbi 28.1 milionë Euro.
Sherifi ka thënë në prezantimin e saj se buxheti total në dispozicion për këtë program për vitin 2022 është 7 milionë Euro dhe 270 mijë Euro për viktimat e dhunës seksuale gjatë luftës në Kosovë.
Turqia është destinacioni kryesor i pacientëve kosovarë që nuk gjejnë shërim në spitalet publike të Kosovës. Shkuarja e tyre në spitalet private turke bëhet kryesisht përmes ndërmjetësuesve në Prishtinë. Disa prej tyre madje janë takuar edhe me ministrin Latifi dy herë radhazi në Stamboll dhe në zyrën e tij në Prishtinë. /Gazeta Shneta/