Jusuf Ulaj, drejtues i Komitetit për Shëndetësi, tha se gjendja aktuale në Shërbimin Spitalor Klinik Universitar të Kosovës është e rëndë dhe se ky institucion po operon jo-profesionalisht e është politizuar.
“Në Ministrinë e Shëndetësisë shumë pozita janë në ushtrues detyre. Është vonuar qëllimshëm mbajtja e kompetencave në Odën e Mjekëve dhe janë zgjedhur vartës të PDK-së. Gjendja aktuale në ShSUK është e rëndë dhe mund të themi se ShSUK është politike dhe joprofesionale. Po shihet që prioritet i kësaj partie është rahatia e militantëve dhe jo zgjedhja e profesionistëve”, tha ai.
Këto komente Ulaj i bëri në tryezën “Gjendja e Shërbimit spitalor dhe klinik universitar – problemet dhe zgjidhjet”, e organizuar nga partia politike “Lëvizja Vetëvendosje”, njofton Ekonomia Online.
Përkrah kësaj deklarate doli edhe Hatixhe Latifi-Pupovci, profesoreshë në Fakultetin e Mjekësisë, e cila tha se problemi kryesor në qendrat klinike është politizimi.
“Të gjithë e dimë që ShSUK-ja ka bord politik. Faji për problemin e Ministrisë së Shëndetësisë qëndron te PDK-ja. Ministria e Shëndetësisë ka bërë që punësimi në Qendrën Klinike të jetë i bazuar në libreza dhe jo në merita. Përkundër faktit që kemi një numër të madh të mjekëve, pacientet na ikin në vendet e rajonit”, tha ajo.
Arben Grazhdani mjek, tha se problemi i mosfunksionimit të mirë qëndron te menaxhmenti.
“Unë mendoj që problemi është te menaxhmenti dhe jo te ligji. Ka të tilla probleme qe nuk besoj që ka mungesë të buxhetit që nuk mund të mbulohet. Është bërë numër i madh i mjekëve nëpër klinika. Mjeku nuk shfrytëzohet sepse nuk ka mundësi të shfrytëzohet. Nuk mendoj që duhet të ketë aq shumë mjekë nëpër klinika. Spitali i shtetit është i mirë vetëm nëse mjekët janë të mirë”.
Përkundër kritikave, nënkryetarja e Lëvizjes Vetëvendosje, Fatmire Kollçaku, tha se Prishtina ka qenë model për funksionimin e mirë të QMF-ve.
“Në oborrin e QKUK-së funksionon një spital privat i cili punon pa pengesa. Komuna e Prishtinës ka qenë një komunë shembull për qendrat e mjekësisë familjare”, theksoi ajo.