Në Qendrën Mjekësore të Urgjencës në Prishtinë gjatë ditës së sotme ka qëndruar kryetari i Odës së Mjekëve të Kosovës, Pleurat Sejdiu.
Ai është pritur nga drejtori i QMU-së, Dr. Bujar Gashi. Gjatë këtij takimi është mbajtur edhe një ligjëratë nga Dr. Luljeta Neziri dhe Dr. Merita Salihu, ndërsa auditin e dytë për mesataren e arritjes në vendin e ngjarjes e ka shpjeguar Dr. Amire Dragusha.
Në një njoftim të publikuar në facebook, sipas statistikave të nxjerra nga QMU e Prishtinës, koha mesatare e arritjes në vendin e ngjarjes është shkurtuar mjaft shumë në dy vitet e fundit.
Koha mes thirrjes dhe nisjes në muajt gusht, shtator dhe tetor në vitin 2016 ka qenë 59.4 sekonda, ndërsa në muajt janar, shkurt dhe mars të vitit 2018 kjo kohë është shkurtuar në vetëm 33.1 sekonda.
Ndërsa koha mes thirrjes dhe arritjes në vitin 2016 ka qenë 16 minuta, e kjo ka rënë në vetëm 6.03 minuta në janar, shkurt dhe mars të vitit 2018. Më poshtë mund të shihni tabelën e prezantimit. /Gazeta Shneta/