Drejtoresha e USAID-it në Kosovë ka përgëzuar stafin e MSH-së dhe ministrin Ismaili në adresimin e rekomandimeve të Zyrës Kombëtare të Auditimit
Ministri i Shëndetësisë Uran Ismaili ka organizuar sot një konferencë për media ku ka folur mbi raportin e Zyrës Kombëtare të Auditimit për vitin 2018. Ai ka deklaruar se kur ka ardhur në pozitën e ministrit, MSH-në e ka gjetur në situatë kaotike dhe tejet shqetësuese dhe këtë më së miri sipas tij e vërteton raporti i ZKA-së për vitin 2017 i cili kishte 27 rekomandime.
“Nga të gjeturat më të rënda kanë qenë blerja e barnave me çmime abuzive, keqpërdorime me avance për udhëtime zyrtare, keqmenaxhimi i projekteve kapitale. Sot jam shumë krenar që numrin e rekomandimeve nga ZKA e kemi zbritur nga 27 në tetë dhe këto rekomandime janë me karakter procedural dhe nuk kanë efekt material. Vlerësimi i raportit për MSH-në është përmirësuar rrënjësisht nga shkalla më e ulët deri te shkalla më e lartë e zbatimit. Ky raport është rezultat i luftës tonë të suksesshme kundër korrupsionit”, ka deklaruar Ismaili.
Në anën tjetër Lisa Magno, drejtoreshë e USAID, e ka përgëzuar ministrin Ismaili dhe administratën së MSH-së për raportin pozitiv të auditimit për vitin 2018. Ajo ka deklaruar se kjo është e mundur vetëm nëse ka vullnet politik dhe nëse mirëqenia e qytetarëve vihet mbi të gjitha prioritetet tjera.
“Përmirësimet dramatike në shëndetësi kanë qenë të nevojshme dhe USAID ka kënaqësinë që të vëj theksin në përparimin e madh që ka bërë ministri dhe personeli i MSH-së. Kjo ministri ka bërë përparime të mëdha në adresimin e rekomandimeve që kanë dal nga raporti i ZKA-së”, ka deklaruar Magno.
Në fund ka folur edhe Sekretari i Përgjithshëm i MSH-së, Dr. Naim Bardiqi, i cili ka shpjeguar metodologjinë dhe planin e punës në bazë të të cilit janë trajtuar të gjitha rekomandimet e ZKA-së nga raporti i vitit 2017. /Gazeta Shneta/