Konsumimi i lartë i ushqimeve ultra të përpunuara mund të ndikojë negativisht në zhvillimin emocional dhe sjellor të fëmijëve në moshë parashkollore, sugjeron një studim i ri.
Hulumtimi, i publikuar në JAMA Network Open, tregon se fëmijët që marrin më shumë kalori nga ushqimet ultra të përpunuara kanë rrezik më të lartë për ankth, frikë, agresivitet apo hiperaktivitet.
Sipas studiuesve, për çdo rritje prej 10% të kalorive që vijnë nga këto ushqime, rriten edhe pikët në testet që matin problemet emocionale dhe të sjelljes.
Studimi u bazua në të dhënat e rreth 2,100 fëmijëve parashkollorë në Kanada. Dieta e tyre u analizua në moshën 3-vjeçare dhe më pas u krahasua me vlerësimet për mirëqenien emocionale dhe sjelljen në moshën 5-vjeçare.
Ushqimet ultra të përpunuara përfshijnë produkte të paketuara si ëmbëlsira industriale, drithëra me shumë sheqer, mishra të përpunuar dhe ushqime të gatshme si patatet e skuqura apo makaronat e përgatitura paraprakisht.
Këto produkte zakonisht përmbajnë sasi të larta yndyrnash të ngopura, sheqeri dhe kripe, si dhe aditivë të ndryshëm.
Sipas autores kryesore të studimit, Dr. Kozeta Miliku nga University of Toronto, edhe zëvendësimi i një pjese të vogël të kalorive nga ushqimet ultra të përpunuara me fruta, perime dhe ushqime më natyrale mund të sjellë përmirësime në sjelljen e fëmijëve./Gazeta Shneta/