Vitet e fundit është rritur shumë popullariteti i ushqyerjes me kohë të kufizuar, i njohur edhe si agjërim.
Studime të mëparshme kanë treguar se kjo mënyrë ushqyerjeje mund të ndihmojë në humbje peshe, përmirësim të kontrollit të sheqerit në gjak, presionit të gjakut dhe ndjeshmërisë ndaj insulinës, si dhe në shëndetin e zemrës dhe trurit, shkruan burimi Medical News Today transmeton Gazeta Shneta.
Një studim i ri i publikuar në “BMJ Medicine”, sugjeron se përfitimet metabolike nuk varen vetëm nga fakti që kufizohet koha e ngrënies, por edhe nga ora kur hahet dhe gjatësia e dritares së ushqyerjes.
Për këtë analizë, studiuesit shqyrtuan të dhëna nga 41 prova të kontrolluara me mbi 2,200 pjesëmarrës.
Ata i ndanë pjesëmarrësit sipas orarit të ngrënies (herët, në mes të ditës, vonë ose sipas zgjedhjes personale) dhe sipas kohëzgjatjes së dritares së ushqyerjes (më pak se 8 orë, 8 orë ose më shumë).
Sipas autorit kryesor, studiues nga “National Taiëan University”, kjo metodë ka fituar interes të madh sepse është më e lehtë për t’u ndjekur sesa dietat që kërkojnë numërim kalorish apo kufizime ushqimore.
Ai thekson se studimi synonte të kuptonte jo vetëm nëse funksionon kjo qasje, por si ndikojnë koha dhe kohëzgjatja në rezultatet metabolike.
Rezultatet treguan se personat që hanin herët ose në mes të ditës kishin përmirësime më të mira: ulje të peshës trupore, perimetrit të belit, indeksit të masës trupore, yndyrës, presionit sistolik dhe glukozës në gjak.
Studiuesit shpjegojnë se kjo mund të lidhet me faktin se ndjeshmëria ndaj insulinës dhe proceset metabolike janë më të favorshme më herët gjatë ditës.
Në të kundërt, ngrënia vonë në mbrëmje, sidomos kur shoqërohej me një dritare më të gjatë ushqyerjeje, ishte modeli më pak efektiv. Kjo mund të jetë në konflikt me ritmet cirkadiane që rregullojnë metabolizmin.
Përfundimi i studiuesve është se jo çdo model ushqyerjeje me kohë të kufizuar jep të njëjtat rezultate. Për përfitime më të mira metabolike, rëndësi ka jo vetëm çfarë hamë, por edhe kur hamë. /Gazeta Shneta/