Tai chi – ushtrimi i njohur mendje–trup nga Kina – mund të jetë po aq i efektshëm sa terapia me psikolog për trajtimin afatgjatë të pagjumësisë kronike.
Këtë e tregon një studim i ri i publikuar në British Medical Journal.
Studiuesit përzgjodhën rastësisht 200 të rritur kinezë mbi moshën 50 vjeç, të cilët vuanin nga pagjumësia kronike. Gjysma e tyre ndoqën seanca të tai chi-së, ndërsa gjysma tjetër iu nënshtrua terapisë konjitive–sjellore (CBT), një lloj terapie me psikolog që përdoret gjerësisht për trajtimin e ankthit, depresionit dhe çrregullimeve të gjumit.
Të dy grupet zhvilluan 24 seanca brenda tre muajve.
Rezultatet treguan se, pas tre muajsh, terapia CBT kishte efekte pak më të mira. Por një vit më vonë, ndryshimi midis dy trajtimeve u zhduk: pjesëmarrësit që praktikuan tai chi patën përmirësim të ngjashëm me ata që ndoqën terapi profesionale.
Studimi thekson se tai chi dhe CBT sollën përfitime të ngjashme në:
cilësinë subjektive të gjumit,
mirëqenien e përgjithshme,
shëndetin mendor,
aktivitetin fizik.
Sipas autorëve, gjetjet mbështesin përdorimin e tai chi-së si metodë alternative dhe afatgjatë për menaxhimin e pagjumësisë tek të rriturit në moshë të mesme dhe të vjetër.
Studiuesit shtojnë se rezultatet mund të jenë edhe më të forta, pasi disa pjesëmarrës ka të ngjarë të kenë vazhduar praktikimin e tai chi-së pas përfundimit të studimit. Nevojiten kërkime të tjera për të parë nëse efektet përsëriten edhe në vendet e tjera dhe në grupmosha të ndryshme.