Hulumtime të reja tregojnë se vaksina kundër herpes zoster mund të lidhet me një ulje të ndjeshme të rrezikut për ngjarje të mëdha kardiovaskulare tek personat me sëmundje ekzistuese të zemrës. Studimi u prezantua në Sesionin Shkencor Vjetor të Kolegjit Amerikan të Kardiologjisë.
Sipas burimit Medical News Today, analiza përfshiu mbi 246,000 të rritur në SHBA me sëmundje kardiovaskulare aterosklerotike.
Rreth gjysma e tyre kishin marrë të paktën një dozë të vaksinës Shingrix ose Zostavax, ndërsa gjysma tjetër jo. Rezultatet treguan se vaksina lidhej me rreziqe më të ulëta në të gjitha kategoritë e studiuara:
– 46% ulje e ngjarjeve të mëdha kardiovaskulare;
– 27% ulje e sulmeve në zemër;
– 27% ulje e goditjeve në tru;
– 33% ulje e insuficiencës kardiake;
– 61% ulje e vdekjeve nga çdo shkak.
Efekti mbrojtës mund të lidhet me parandalimin e inflamacionit dhe mpiksjes së rrezikshme të gjakut që shkaktohet nga infeksioni i herpes zosterit. Studiuesit theksojnë se këto përfitime janë të krahasueshme me ato të pritura nga ndalimi i duhanit.
Përveç mbrojtjes ndaj herpesit, këto të dhëna sugjerojnë se vaksinimi mund të ketë një ndikim të konsiderueshëm në reduktimin e komplikacioneve të zemrës dhe vdekshmërisë tek të rriturit mbi 50 vjeç, duke mbështetur rekomandimet për vaksinim të gjerë.
Sipas Cheng-Han Chen, një ulje prej 46% e ngjarjeve kardiovaskulare dhe 61% e vdekshmërisë është një ndërhyrje jashtëzakonisht e rëndësishme për shëndetin publik. /Gazeta Shneta/