Vitet e fundit është rritur interesi për mënyrat se si njerëzit mund të ngadalësojnë ose përmirësojnë plakjen biologjike, një koncept që i referohet moshës reale të shëndetit dhe funksionimit të trupit në nivel molekular, dhe jo thjesht numrit të viteve të jetuara.
Ndryshe nga mosha kronologjike, plakja biologjike ndikohet nga shumë faktorë dhe mund të ndryshojë ndjeshëm nga një person te tjetri, shkruan burimi Medical News Today transmeton Gazeta Shneta.
Studime të mëparshme kanë treguar se shpejtësia e plakjes biologjike ndikohet nga gjenetika, prania e sëmundjeve kronike, ushqyerja, stresi, gjumi, aktiviteti fizik, duhanpirja dhe konsumimi i alkoolit.
Sipas ekspertëve, megjithëse njerëzit po jetojnë gjithnjë e më gjatë, shumë prej tyre i kalojnë vitet e fundit duke u përballur me sëmundje kronike, paaftësi fizike dhe rënie të funksioneve mendore.
Qëllimi i ngadalësimit të plakjes biologjike nuk është vetëm zgjatja e jetës, por rritja e viteve të jetuara në shëndet të mirë, me funksionim më të lartë fizik dhe njohës.
Studiuesit theksojnë se ndërhyrjet duhet të ndodhin herët, përpara se të shfaqen sëmundjet dhe paaftësitë, në mënyrë që të përmirësohet shëndeti i popullatës në moshë të shtyer.
Aktualisht, shkencëtarët po studiojnë disa medikamente që mund të ndikojnë në ngadalësimin e plakjes biologjike, përfshirë metforminën, e përdorur për diabetin e tipit 2, rapamicinën, një ilaç imunosupresiv, si dhe rilmenidinën për kontrollin e tensionit të gjakut.
Duke iu shtuar këtyre kërkimeve, një studim i ri i publikuar në “Journals of Gerontology”, sugjeron se vaksina kundër herpes zosterit mund të ndihmojë në ngadalësimin e plakjes biologjike tek të moshuarit, duke hapur perspektiva të reja për përmirësimin e shëndetit në moshë të avancuar. /Gazeta Shneta/