Sipas një raporti të ri, gratë humbasin kolektivisht rreth 75 milionë vite jetë të shëndetshme çdo vit, ekuivalente me afërsisht një javë shëndet të humbur për çdo grua në vit. Edhe pse gratë dhe vajzat përbëjnë 49% të popullsisë globale dhe jetojnë më gjatë se burrat, ato kalojnë rreth 25% më shumë të jetës së tyre në gjendje jo të mirë shëndetësore ose me aftësi të kufizuara. Megjithatë, investimet në shëndetin e grave mbeten jashtëzakonisht të ulëta dhe të përqendruara në pak fusha specifike.
Sipas një raporti të Forumit Ekonomik Botëror (WEF) dhe Boston Consulting Group (BCG), vetëm 6% e investimeve private globale në shëndetësi i dedikohen shëndetit të grave, ndërsa kompanitë që fokusohen ekskluzivisht në këtë fushë marrin më pak se 1% të financimeve, shkruan burimi Euronews Health transmeton Gazeta Shneta.
Pabarazia është edhe më e theksuar në teknologjinë shëndetësore. Në vitin 2023, kompanitë e shëndetit të grave përfituan vetëm 2% të fondeve globale të kapitalit sipërmarrës në këtë sektor.
Ndërkohë, studime tregojnë se përmirësimi i diagnostikimit dhe kujdesit për vetëm katër gjendje — menopauzën, osteoporozën, sëmundjen e Alzheimerit dhe sëmundjet kardiovaskulare — mund të krijonte mbi 100 miliardë dollarë vlerë tregu.
Shumë sëmundje prekin gratë në mënyrë të veçantë ose disproporcionale, si endometrioza, sindroma e vezores policistike, menopauza dhe disa lloje kanceri. Megjithatë, pesë gjendje specifike gjinore përbëjnë 14% të barrës së sëmundjeve tek gratë, por kanë marrë më pak se 1% të fondeve kërkimore.
Raporti thekson se mbyllja e këtij hendeku kërkon prova shkencore më të forta, përfaqësim më të madh të grave në studime klinike dhe udhëheqje të koordinuar ndërsektoriale, në mënyrë që inovacioni të shndërrohet në politika dhe shërbime konkrete që përmirësojnë realisht shëndetin e grave. /Gazeta Shneta/