Vaksina Pfizer / BioNTech mund të jetë më pak efektive tek njerëzit me mbipeshë, sugjerojnë të dhënat e fundit.
Studiuesit italianë kanë zbuluar se punonjësit e kujdesit shëndetësor me mbipeshë prodhuan vetëm rreth gjysmën e sasisë së antitrupave në përgjigje të një doze të dytë të vaksinës krahasuar me njerëzit e shëndetshëm shkruan The Guardian përcjell Gazeta Shneta.
Megjithëse është shumë shpejt për të ditur se çfarë do të thotë kjo për efikasitetin e vaksinës, është lënë të nënkuptohet se personat me mbipeshë kanë nevojë për një dozë shtesë përforcuese për t’u siguruar që ata janë të mbrojtur në mënyrë adekuate ndaj koronavirusit.
Studimi i mëparshëm ka sugjeruar që mbipesha – e cila përcaktohet si indeks i masës trupore mbi 30, rrit rrezikun e humbjes së jetës si pasojë e Covidit me gati 50% të shanseve si dhe rrit rrezikun e përfundimit në spital me 113%.
Disa nga këto mund të ndodhin sepse njerëzit me mbipeshë shpesh kanë gjendje të tjera mjekësore, të tilla si sëmundje të zemrës ose diabet tip 2, që rrisin rrezikun e tyre për prekje nga koronavirusi, por dhjami i tepërt i trupit gjithashtu mund të shkaktojë ndryshime metabolike, të tilla si rezistenca ndaj insulinës dhe inflamacioni, të cilat e bëjnë më të vështirë për trupin të luftojë infeksionet.
Kjo gjendje konstante e inflamacionit të shkallës së ulët mund të dobësojë gjithashtu përgjigje të caktuara imune, përfshirë ato të nisura nga qelizat B dhe T që shkaktojnë një përgjigje mbrojtëse pas vaksinimit.
Një hulumtim i veçantë ka treguar se vaksina e gripit është vetëm gjysma efektive tek njerëzit me mbipeshë krahasuar me ata që kanë një peshë të shëndetshme.
Studimi i ri, i cili ende nuk është shqyrtuar nga kolegët, ofron provat e para të drejtpërdrejta për të sugjeruar se një problem i ngjashëm mund të ndodhë edhe me vaksinat Covid-19. /Gazeta Shneta/