Varësia nga droga në Kosovë sa vjen e shtohet dhe kjo dëshmohet çdo ditë me kapjen dhe arrestimin e dhjetëra personave konsumues të substancave narkotike.
Por kjo dukuri nuk po i mban imun as personat që janë prapa grilave. Sikleti për të konsumuar drogë po i detyron ata që të kërkojnë nga të afërmit të veprojnë kundërligjshëm, për t’iu dërguar sasi të ndryshme të narkotikëve, raporton Gazeta Sinjali.
Vetëm gjatë ditëve të fundit, janë zbuluar disa raste të tilla në Qendrën Korrektuese në Dubravë.
Burimet e Gazetës Sinjali bëjnë me dije se fillimisht mes dy pavijoneve është gjetur një sasi e substancës narkotike të llojit marihuanë, e cila është sekuestruar në cilësinë e provës materiale.
Po ashtu, marihuanë e ndarë në disa vende është gjetur edhe gjatë kontrollimit të një hapësire brenda burgut, por që nuk dihet ende se prej nga erdhi aty.
Në pjesën e jashtme të burgut janë gjetur mbi 10 doza marihuanë, të cilat po ashtu janë sekuestruar.
Me urdhër të prokurorit, janë iniciuar tri raste të ndara për veprën penale ‘Blerja, posedimi, shpërndarja apo shitja e paautorizuar e narkotikëve, substancave psikotrope ose analoge’, ndërsa veprimet tjera ligjore do merren posa të identifikohen të dyshuarit. /GazetaSinjali/