Valët e të nxehtit po ndikojnë ndjeshëm në shëndetin e grave shtatzëna dhe të të porsalindurve në Evropë, sipas një studimi të ri që ka analizuar miliona lindje në disa shtete evropiane.
Sipas të dhënave, temperaturat e larta mund të nxisin lindje të parakohshme, duke rritur rrezikun sidomos gjatë ditëve me temperatura ekstreme. Studimi vlerëson se rreth 1.41% e lindjeve të parakohshme gjatë verës lidhen drejtpërdrejt me nxehtësinë.
Në ditët me temperatura mesatare të larta, rreziku rritet me 2.8%, ndërsa në ditët me valë ekstreme të nxehtit arrin deri në 3.8%.
Analiza ka përfshirë rreth 36.6 milionë lindje në 250 qytete të 13 vendeve evropiane, gjatë periudhës 1979–2019.
Sipas studimit, vendet më të prekura janë Spanja, Italia dhe Estonia, ndërsa normat më të ulëta janë regjistruar në Zvicër.
Studiuesit theksojnë se jo të gjitha gratë shtatzëna janë të ekspozuara në mënyrë të njëjtë ndaj rrezikut, pasi faktorë si kushtet socio-ekonomike, niveli i arsimit dhe qasja në kujdes shëndetësor ndikojnë në ndjeshmërinë ndaj temperaturave të larta.
Po ashtu, periudha më e ndjeshme e shtatzënisë për lindje të parakohshme vlerësohet të jetë nga java e 31-të deri në javën e 40-të.
Ekspertët shpjegojnë se nxehtësia mund të ndikojë në organizëm duke rritur temperaturën trupore, duke shkaktuar dehidrim dhe duke ndikuar në proceset biologjike që lidhen me zhvillimin e fetusit dhe fillimin e kontraksioneve të mitrës.