Mos raportimi i vdekjes së dyshimtë nga ana e QKUK-së për tre pacientët, ka vështirësuar punën e Institutit të Mjekësisë Ligjore rreth procesit të autopsisë.
Kjo për arsye se varrimi ka shkaktuar dëmtime dhe kalbëzimi i trupave ka destabilizuar gjendjen për të nxjerrë rezultate të shpejta.
Drejtori i Institutit, Arsim Gërxhaliu, ka deklaruar se janë duke shqyrtuar mundësitë për t’i dërguar analizat jashtë vendit për shkak të rastit të komplikuar, shkruan Gazeta Shneta.
Prokuroria thotë se është në pritje të këtyre rezultateve për të vazhduar tutje me hetimet.
“Prokuroria në bashkëpunim me Policinë e Kosovës është duke zhvilluar hetime në rastin konkret. Jemi në pritje të raportit të autopsisë nga Instituti i Mjekësisë Ligjore për të vdekurit, vdekja e të cilëve është cilësuar si e dyshimtë”, thuhet në përgjigjen e Prokurorisë.
Kjo e fundit nuk tregon nëse deri më tani ka ndonjë të dyshuar për rastin.
“Duke pas parasysh se rasti është në hetim e sipër, në këtë fazë të procedurës nuk mund të japim të dhëna tjera”, është përgjigjur Prokuroria, e cila është duke hetuar tri raste të vdekjeve të dyshimta.
Por kështu nuk pretendon Qendra Klinike Universitare e Kosovës, e cila po insiston se janë 2 vdekje të dyshimta.
Drejtori i SHSKUK-së, Curr Gjocaj, ka deklaruar se vetëm 2 pacientë që janë operuar më 7 shtator, kanë ndërruar jetë, ndërsa i treti nuk është futur në operacion.
Prokuroria nuk ka sqaruar këtë deklaratë të tij.
Gjocaj deri më tani nuk ka pranuar të marr përgjegjësi për vdekjen e pacientëve, duke u arsyetuar se nuk punon në sallat e operacionit.
Gjatë ditës së sotme ai ka pritur kryeministrin Ramush Haradinaj dhe ministrin e Shëndetësisë, Uran Ismaili. Mediat kanë raportuar se kryeministri ka kërkuar nga Gjocaj detaje për vdekjen e pacientëve, ndërsa ka paralajmëruar se do të ballafaqohen me defektet që kanë ndodhur në QKUK. /Gazeta Shneta/