Vetëm 90 deri në 119 minuta ushtrime për forcimin e muskujve në javë mund të ndihmojnë në zgjatjen e jetës dhe uljen e rrezikut nga sëmundje serioze, sipas një studimi të publikuar në revistën shkencore “British Journal of Sports Medicine”.
Studiuesit kanë ndjekur më shumë se 147 mijë të rritur për një periudhë deri në 30 vjet, duke analizuar ndikimin e aktivitetit fizik në shëndetin afatgjatë.
Sipas rezultateve, personat që kryenin rreth një orë e gjysmë deri në dy orë ushtrime për forcimin e muskujve gjatë javës kishin 13 për qind më pak rrezik për vdekje të parakohshme nga çfarëdo shkaku.
Po ashtu, ata kishin 19 për qind më pak rrezik për të vdekur nga sëmundjet e zemrës dhe 27 për qind më pak rrezik për vdekje nga sëmundjet neurologjike dhe të trurit.
Në këtë kategori përfshihen ushtrime si ngritja e peshave, pompat, ulje-ngritjet dhe aktivitete të tjera që ndihmojnë në forcimin e muskujve.
Studiuesit vunë re se përfitimet ishin edhe më të mëdha tek personat që, krahas ushtrimeve për forcimin e muskujve, praktikonin edhe aktivitete aerobike si ecja, vrapimi, çiklizmi apo noti.
Autorët e studimit theksojnë se kombinimi i ushtrimeve aerobike me ato për forcimin e muskujve mund të sjellë përfitimet më të mëdha për shëndetin dhe jetëgjatësinë.