Ministri në detyrë i Shëndetësisë, Arben Vitia, ka njoftuar se ka nisur zbatimi i Ligjit për Sigurimin e Detyrueshëm të Kujdesit Shëndetësor, duke e cilësuar këtë si një hap të rëndësishëm drejt reformimit të sistemit shëndetësor në vend.
Përmes një postimi në rrjetin social “Facebook”, Vitia bëri të ditur se më 1 qershor 2026, me vendim të Qeverisë së Kosovës, ka hyrë në fuqi zbatimi i ligjit, ndërsa tashmë ka nisur edhe procesi për themelimin e Fondit të Sigurimit të Detyrueshëm të Kujdesit Shëndetësor të Republikës së Kosovës.
“Sot po nis hapi i parë i zbatimit të këtij ligji, me fillimin e procesit për themelimin e Fondit të Sigurimit të Detyrueshëm të Kujdesit Shëndetësor të Republikës së Kosovës”, ka shkruar Vitia.
Sipas tij, ky proces paraqet një etapë të rëndësishme në ndërtimin e sistemit të sigurimit të detyrueshëm shëndetësor dhe në zbatimin gradual të të drejtave dhe përfitimeve të parapara me ligj për qytetarët e Kosovës.
Ligji për Sigurimin e Detyrueshëm të Kujdesit Shëndetësor ishte miratuar nga Kuvendi i Kosovës në muajin prill, ndërsa tani ka hyrë në fazën e zbatimit praktik./Gazeta Shneta/