Yndyra bezhë mund të luajë një rol të rëndësishëm në rregullimin e presionit të gjakut, sipas një studimi paraklinik të ri të kryer te minjtë. Presioni i lartë i gjakut, i njohur si hipertension, ka disa shkaqe, ndër të cilat edhe obeziteti. Sipas Organizatës Botërore të Shëndetësisë, në vitin 2024 rreth 1.4 miliardë të rritur në mbarë botën vuanin nga hipertensioni, i cili konsiderohet faktori kryesor i rrezikut për vdekshmëri globale dhe lidhet me gati gjysmën e vdekjeve nga sëmundjet e zemrës dhe goditjet në tru.
Disa faktorë rreziku për tensionin e lartë, si mosha, gjenetika dhe përkatësia etnike, nuk mund të ndryshohen. Megjithatë, faktorë të tjerë si dieta, aktiviteti fizik, stresi, duhanpirja dhe obeziteti janë të modifikueshëm. Personat me obezitet zakonisht kanë më shumë yndyrë të bardhë, e cila ruan energjinë, dhe më pak yndyrë bezhë, e cila ndihmon në djegien e kalorive, shkruan burimi Medical News Today transmeton Gazeta Shneta.
Yndyra bezhë është një lloj yndyre në trupin tonë që nuk ruan energji, por e djeg atë.
Studimi, i publikuar në revistën “Science”, përdori një model me minj të modifikuar gjenetikisht, të cilëve u ishte hequr gjeni “Prdm16”, duke i penguar ata të formonin yndyrë bezhë. Kjo u lejoi studiuesve të vëzhgonin ndikimin e mungesës së kësaj yndyre në rregullimin e presionit të gjakut.
Sipas autores kryesore të studimit, Mascha Koenen, yndyra bezhë dhe ajo kafe përbëjnë të ashtuquajturën yndyrë termogjene, e cila djeg energji për të prodhuar nxehtësi.
Aktivizimi i kësaj yndyre, për shembull nga ekspozimi ndaj të ftohtit, është lidhur me rrezik më të ulët për sëmundje kardiovaskulare dhe metabolike, përfshirë hipertensionin.
Studiuesit u fokusuan te yndyra bezhë e minjve sepse ajo ngjan shumë me yndyrën termogjene te të rriturit njerëzorë.
Qëllimi i tyre ishte të kuptonin më mirë mekanizmat molekularë përmes të cilëve kjo yndyrë mund të kontribuojë në rregullimin e presionit të gjakut, duke hapur rrugë për strategji të reja parandaluese në të ardhmen. /Gazeta Shneta/