Ish-ministri i Shëndetësisë, Armend Zemaj, ka ngritur shqetësime lidhur me, siç thotë ai, ndikimin e korrupsionit dhe interesave të grupeve të caktuara farmaceutike në Ministrinë e Shëndetësisë dhe në institucionet e tjera përgjegjëse të sistemit shëndetësor.
Sipas Zemajt, gjendja aktuale në Qendrën Klinike Universitare të Kosovës (QKUK) dhe në spitalet rajonale paraqet degradim dhe keqmenaxhim, duke arritur nivele shqetësuese, përcjell Gazeta Shneta.
Ai ka theksuar se pacientët përballen me mungesë të barnave, që sipas tij vjen si pasojë e menaxhimit të dobët, shpërdorimeve apo keqpërdorimeve të mundshme. Po ashtu, Zemaj ka shprehur shqetësime edhe për cilësinë dhe origjinën e disa barnave që, sipas tij, hyjnë në sistemin publik shëndetësor, duke kërkuar hetim të pavarur për këto çështje.
Zemaj ka ngritur gjithashtu shqetësime për tenderët njëburimorë dhe çmimet e larta në prokurimet publike në sektorin e shëndetësisë, duke theksuar nevojën për hetim dhe llogaridhënie institucionale.