Prediabeti është një gjendje në të cilën niveli i sheqerit në gjak është më i lartë se normalja, por ende nuk ka arritur kufijtë e diabetit të tipit 2. Pa ndërhyrje, kjo gjendje mund të çojë në zhvillimin e diabetit, por edhe të rrisë rrezikun për sëmundje të tjera serioze si sëmundjet e zemrës dhe goditja në tru.
Një studim i ri ka treguar se ndryshimet në stilin e jetesës janë më efektive se ilaçi metformin në parandalimin e disa sëmundjeve kronike tek personat me prediabet, shkruan burimi Medical News Today transmeton Gazeta Shneta.
Studiuesit analizuan të dhënat e 1,173 pjesëmarrësve për 21 vjet, duke i ndarë ata në tre grupe: ndërhyrje në stilin e jetesës, trajtim me metformin dhe placebo.
Pjesëmarrësit në grupin e stilit të jetesës ndoqën një program të strukturuar që synonte humbjen e të paktën 7% të peshës trupore, reduktimin e kalorive dhe yndyrnave në dietë, si dhe kryerjen e të paktën 150 minutave aktivitet fizik në javë. Ndërkohë, grupi me metformin mori medikamentin dy herë në ditë.
Pas më shumë se dy dekadash ndjekjeje, 85% e pjesëmarrësve kishin zhvilluar të paktën dy sëmundje kronike. Megjithatë, personat që kishin ndjekur programin e stilit të jetesës kishin më pak probleme shëndetësore krahasuar me grupet e tjera.
Vetëm 72% e tyre kishin më shumë se tri sëmundje kronike, kundrejt 81% në grupet me metformin dhe placebo.
Ekspertët theksojnë se dieta e shëndetshme, aktiviteti fizik, kontrolli i peshës, gjumi cilësor dhe menaxhimi i stresit ndikojnë në procese të shumta biologjike, duke ulur inflamacionin, përmirësuar ndjeshmërinë ndaj insulinës dhe mbrojtur shëndetin e zemrës, trurit dhe enëve të gjakut.
Sipas autorëve, mesazhi kryesor është i qartë: të njëjtat zakone që ndihmojnë në parandalimin e diabetit mund të mbrojnë edhe nga shumë sëmundje të tjera kronike, duke përmirësuar cilësinë e jetës dhe duke kontribuar në plakje më të shëndetshme. /Gazeta Shneta/