Me rritjen e rasteve të gripit sezonal, primare është informimi për parandalimin e komplikimeve dhe përhapjes së infeksionit. Në kuadër të rubrikës “Mjeku i Javës”, Gazeta Shneta ka zhvilluar një intervistë me Dr. Edmond Morina, specialist i mjekësisë familjare, i cili flet për dallimin mes gripit dhe ftohjes, simptomat më të shpeshta, grupet më të rrezikuara, si dhe masat praktike për mbrojtje në përditshmëri.
Intervista e plotë:
Dr. Morina: Gripi sezonal është një infeksion viral i rrugëve të frymëmarrjes. Përhapet kryesisht përmes kollës, teshtimës dhe kontaktit me sipërfaqe të kontaminuara.Gripi zakonisht fillon papritur dhe shkakton ethe, dhimbje muskujsh dhe lodhje të fortë, ndërsa ftohja ka fillim gradual dhe simptomat janë më të lehta, si rrjedhje hundësh ose teshtima.
Cilat janë simptomat më të shpeshta të gripit sezonal?
Dr. Morina: Ethe të larta, kolla e thatë, lodhje dhe dobësi, dhimbje muskujsh dhe koke, ndonjëherë të vjella ose diarre tek fëmijët.
Si mund të mbrohemi nga gripi sezonal në përditshmëri?
Dr. Morina: Vaksinimi vjetor, larja e duarve, dezinfektimi i sipërfaqeve, përdorimi i maskës në ambiente të mbyllura, ajrosja e rregullt, pushimi i mjaftueshëm dhe ushqimi i shëndetshëm.
Cilat kategori janë më të rrezikuara nga komplikimet e gripit sezonal?
Dr. Morina: Të moshuarit mbi 65 vjeç, fëmijët nën 5 vjeç, gratë shtatzëna, personat me sëmundje kronike si zemra, mushkëritë ose diabeti, dhe personat me imunitet të dobësuar.
Cilat janë gabimet më të shpeshta që bëjnë qytetarët gjatë gripit sezonal? (Rastet në bazë përvojës tuaj)?
Dr. Morina: Shkuarja në punë ose shkollë duke qenë të sëmurë, përdorimi i antibiotikëve pa udhëzim mjeku, mosvaksinimi, dhe mosmonitorimi i simptomave të rënda (nga përvoja e punës).
Si ka ndryshuar trajtimi i gripit sezonal pas pandemisë COVID-19, në aspektin e diagnostikimit dhe menaxhimit të pacientëve?
Dr. Morina: Tani përdoren më shpesh testet antigjenike dhe PCR për diagnostikim të saktë, pacientët me simptoma monitorohen më ngushtë, dhe ka fokus më të madh tek izolimi dhe përdorimi i antiviraleve tek rastet e rrezikuara.
Cilat janë faktorët që e bëjnë një pacient më të rrezikuar nga komplikimet e gripit, dhe si i identifikoni në praktikën e përditshme?
Dr. Morina: Mosha e madhe, sëmundjet kronike, imuniteti i dobësuar, shtatzënia dhe obeziteti i rëndë. Identifikohen nga anamneza, ekzaminimi dhe monitorimi i parametrave vitalë.
Sa efektive është vaksina kundër gripit sezonal tek të rriturit dhe fëmijët, dhe pse ndonjëherë nuk parandalon infeksionin 100%?
Dr.Morina: Efektiviteti varion 40–60% tek të rriturit dhe zakonisht më i lartë tek fëmijët. Nuk parandalon gjithmonë infeksionin për shkak të mutacioneve të virusit dhe reagimit individual të imunitetit.
Si duhet të menaxhohen antibiotikët tek pacientët me grip sezonal, për të shmangur komplikimet e mundshme?
Dr. Morina: Antibiotikët nuk përdoren për gripin viral. Vetëm nëse shfaqen komplikime bakteriale të diagnostikuara nga mjeku.
Çfarë këshillash do t’u jepnit familjeve për të parandaluar përhapjen e gripit në shtëpi?
Dr. Morina: Izoloni personin e sëmurë, mbani higjienë të rregullt, mos ndani gota ose enë, ajrosni ambientet, monitoroni simptomat dhe kërkoni ndihmë mjekësore në rast se ethet ose vështirësia në frymëmarrje përkeqësohen./Gazeta Shneta/