Pirja e moderuar e kafesë, rreth 2 deri në 3 filxhanë në ditë, mund të ndihmojë në uljen e rrezikut për probleme të shëndetit mendor si ankthi dhe depresioni, sugjeron një studim i ri i gjerë ndërkombëtar.
Studimi, i publikuar në “Journal of Affective Disorders”, analizoi të dhënat e mbi 460 mijë personave dhe i ndoqi ata për më shumë se 13 vite, shkruan burimi Medical News Today transmeton Gazeta Shneta.
Rezultatet treguan se personat që konsumonin kafe në mënyrë të moderuar kishin më pak gjasa të zhvillonin çrregullime të lidhura me stresin, krahasuar me ata që nuk pinin fare ose që konsumonin sasi më të mëdha.
Sipas studiuesve, ekziston një lidhje në formë “J”, që do të thotë se përfitimet janë më të mëdha në nivele të moderuara, ndërsa konsumimi i tepërt mund të ketë efekt të kundërt. Konkretisht, ata që pinin 5 ose më shumë filxhanë në ditë kishin rrezik më të lartë për probleme të shëndetit mendor.
Ekspertët shpjegojnë se kafeina, në sasi të moderuar, mund të përmirësojë humorin, përqendrimin dhe energjinë, duke ndikuar në kimikatet e trurit si dopamina.
Gjithashtu, kafeja përmban përbërës me veti antioksiduese dhe anti-inflamatore, të cilët mund të luajnë rol në mbrojtjen e shëndetit të trurit.
Megjithatë, studimi thekson se bëhet fjalë për një lidhje dhe jo për një provë të drejtpërdrejtë se kafeja ul rrezikun e këtyre çrregullimeve.
Konsumimi i tepërt i kafesë mund të rrisë ankthin, të prishë gjumin dhe të ndikojë negativisht në mirëqenien mendore.
Në përfundim, studiuesit sugjerojnë se një konsum i balancuar i kafesë mund të jetë pjesë e një stili jetese të shëndetshëm, por pa e tepruar. /Gazeta Shneta/