Qumështi i nënës është qumështi më i përshtatshëm për beben tuaj.
Qumështi i nënës përmirëson imunitetin e bebes, e mbron atë nga bakteriet dhe viruset.
Përbërja e qumështit të nënës nuk është çdo herë e njejtë. Kulloshtra është e përshtatshme për foshnjën e porsalindur. Qumështi i mëtejshëm i nënës ndryshon çdo dite, deri edhe nga një ushqyerje në tjetrën.
Dhënia e çdo ushqimi tjetër, qoftë edhe shtimi i ujit zvogëlon dobitë që jep qumështi i nënës.
Pra, duhet të jeni të sigurt që qumështi juaj dhe vetëm qumështi juaj është me i miri për foshnjën tuaj!
Kulloshtra
Kulloshtra fillon të krijohet në gji në muajin e shtatë të shtatzënisë. Kulloshtra, një lëng i dendur, i ngjitur dhe me ngjyrë të verdhë, përbën ushqimin e parë e më të mire për bebën tuaj për arsyet e mëposhtme:
• Përmban më tepër proteina dhe vitamine A në krahasim me qumështin që pason.
• Kulloshtra ndihmon të porsalindurit per eliminimin e mbeturinave të para të zorrës (fekaleve).
• Është gjithashtu efikase për eleminimin e produkteve të zbërthyera nga bilirubina dhe zvogëlon kështu rrezikun për paraqitje të verdhëzës së foshnjës.
• Imunoglobulinat (kryesisht IgA) e kulloshtrës i mundësojnë të porsalindurit mbrojtje nga infeksionet.
Kulloshtra është “vaksina” e pare për të porsalindurin kundër shumë baktereve dhe viruseve.
Zëvendësimi me ujë ose qumësht artificial i ushqyerjeve të para të fëmijës e pakëson prodhimin e kulloshtrës dhe qumështin ne tërësi. Prandaj është shumë e rëndësishme që kulloshtra të mos hidhet, por ti jepet fëmijës jo vetëm për dobitë që ka, por edhe për këtë aspekt të sajin. / Gazeta Shneta /