Agjencia Evropiane e Barnave (EMA), thotë se ka filluar një vlerësim të shpejtë nëse do të rekomandojë një dozë përforcuese të tretë të vaksinës së koronavirusit të prodhuar nga Pfizer/BioNTech.
Në një deklaratë të hënën, rregullatori i barnave të BE -së, thotë se po shqyrton nëse një dozë e tretë e vaksinës duhet të jepet gjashtë muaj pasi individët mbi 16 vjeç e sipër – kanë marrë të dy doza, ‘për të rivendosur mbrojtjen pasi të jetë zbehur numri i antitrupave’, shkruan MedicalxPress përcjell Gazeta Shneta.
Ekspertët e EMA-së, po kryejnë një “vlerësim të përshpejtuar” të të dhënave të paraqitura nga Pfizer dhe BioNTech, duke përfshirë rezultatet nga një hulumtim i vazhdueshëm në të cilin rreth 300 të rritur të shëndetshëm morën një dozë përforcuese rreth gjashtë muaj pas dozës së tyre të dytë.
Kompania Pfizer tashmë ka paraqitur një kërkesë tek Administrata e Ushqimit dhe Barnave të SHBA-së, FDA, për autorizimin e një doze të tretë dhe qeveria amerikane, njoftoi që muajin e kaluar se një dozë e tretë ka të ngjarë të jetë në dispozicion deri në fund të shtatorit.
Izraeli tashmë ka filluar të administrojë doza përforcuese dhe plani është duke u shqyrtuar në vende të tjera për popullatat e cenueshme, përfshirë Francën dhe Gjermaninë.
Organizata Botërore e Shëndetësisë u është lutur vendeve të pasura që të mos përdorin dozat përforcuese deri të paktën në fund të shtatorit, duke thënë se nuk ka të dhëna shkencore që vërtetojnë se dozat janë të nevojshme. Ekspertët e OBSH-së, thonë se vaksinat COVID-19 do të viheshin në përdorim më të mirë në vendet në zhvillim, të cilat kanë marrë më pak se 2% të më shumë se 5 miliardë dozave të administruara.
Agjencia EMA me qendër në Amsterdam, njofton se pret që të marrë një vendim nëse do të rekomandojë ose jo – një dozë të tretë të vaksinës Pfizer në javët e ardhshme. /Gazeta Shneta/