Ministri Rifat Latifi ka shfrytëzuar për turizëm udhëtimin e tij zyrtar në Greqi duke vizituar Akropolin.
Ministri i Shëndetësisë Rifat Latifi ka udhëtuar në Greqi dy ditë më parë për një vizitë zyrtare, siç është thënë për të biseduar me homologun e tij për mundësitë e bashkëpunimit të të dy vendeve.
Por këtë udhëtim zyrtar, Latifi po e shfrytëzon edhe për turizëm. Këshilltarja e tij, Lumturije Bekaj, ka publikuar disa fotografi në Facebook ku shihet së bashku me ministrin dhe zyrtarin e MSH-së Mentor Sadiku.
Treshja kanë vizituar qytetin antik të Akropolit në Greqi ku kanë bërë edhe disa fotografi.
Sipas një komunikate të MSH-së të publikuar dje, Latifi sot është dashur të takohej me homologun e tij grek. Deri më tani nuk është njoftuar nëse ky takim ka ndodhur apo jo.
Ministri Latifi që prej emërimit të tij para 10 muajsh ka bërë rreth tetë udhëtime jashtë vendit. Nga janari i këtij viti deri në korrik, Latifi dhe ekipa e tij për udhëtime zyrtare kanë shpenzuar rreth 5 mijë e 500 Euro.
Për këto udhëtime Latifi është kritikuar nga opozita dhe shoqëria civile. /Gazeta Shneta/
