Menaxhmenti i Shërbimit Spitalor Klinik Universitar ka kërkuar nga drejtori i Kardiokirurgjisë të marr masa për publikimin e operacionit nga kardiokirurgu Kushtrim Shala.
SHSKUK ka deklaruar për Gazetën Shneta se drejtorët e njësive janë të njoftuar për ndalesën e publikimit të shkrimeve dhe fotografive nga institucionet ku punojnë, prandaj ka kërkuar që të merren masa nga drejtori i Kardiokirurgjisë.
“Të gjithë drejtorët e klinikave, spitaleve të përgjithshme dhe njësive tjera në kuadër të ShSKUK-së, disa herë janë të njoftuar përmes Urdhëresës, në formë të Qarkores Informative, nga menaxhmentet në të kaluarën, por edhe tani, se kanë ndaluar publikimin e shkrimeve, fotografive dhe materialeve tjera nga institucionet ku punojnë, pa autorizim paraprak nga Zyra për Medie dhe Marrëdhënie me Publikun në ShSKUK, kjo me qëllim që informatat që publikohen të jenë konform kritereve të përcaktuara etike dhe profesionale. Secili drejtor i institucionit, në këtë rast edhe drejtori i Shërbimit të Kardiokirurgjisê, ka obligim që të ndërmarrë masat konform legjislacionit në fuqi, për mosrespektim të kësaj urdhërese”, thuhet në përgjigjen e SHSKUK-së.
Megjithatë SHSKUK nuk ka dhënë sqarime nëse do të rishikohet rasti i pacientit, aq më tepër pas deklaratave të drejtorit të Kardiokirurgjisë Rifat Brahimaj, se mjekët që kanë kryer operacionin “David”, nuk kanë kompetencë profesionale.
Kardiokirurgu Kushtrim Shala ka postuar dje në Facebook një operacion të rrallë të quajtur “David”, duke pretenduar se intervenimi është kryer me sukses. Ndërkaq pacienti kishte ndërruar jetë disa orë më vonë në mjekimin intensiv të Kardiokirurgjisë. /Gazeta Shneta/