Një studim i publikuar në Canadian Medical Association Journal ka zbuluar një rritje të konsiderueshme të çrregullimeve hipertensive në shtatzëni në Kanada. Ky raport alarmant bazohet në analizën e të dhënave nga 2.8 milionë lindje spitalore gjatë periudhës 2012-2021.
Studiuesit kanë vërejtur një rritje të përgjithshme prej 40% në prevalencën e çrregullimeve hipertensive në shtatzëni, duke kaluar nga 6.1% në 8.5%. Këto rritje përfshijnë hipertensionin paraekzistues (nga 0.6% në 0.9%), hipertensionin gjestacional (nga 3.9% në 5.1%), dhe preeklampsinë (nga 1.6% në 2.6%), shkruan Million Heart, transmeton Gazeta Shneta.
Pavarësisht këtij rritjeje në prevalencën e çrregullimeve hipertensive, është vërejtur një ulje e komplikacioneve të rënda, si lindjet e parakohshme, vdekja intrauterine dhe shtrimi i nënës në terapi intensive. Megjithatë, ka pasur një rritje të normave të operacioneve cezariane (nga 42.0% në 44.3%) dhe të pamjaftueshmërisë renale akute (nga 0.4% në 0.6%) te gratë e prekura nga çrregullimet hipertensive.
Studimi gjithashtu ka zbuluar se gratë me diabet paraekzistues kanë një rrezik më të lartë për zhvillimin e çrregullimeve hipertensive. Autorët e studimit sugjerojnë se kjo rritje mund të lidhet gjithashtu me faktorë të tjerë, të cilët nuk janë përfshirë në këtë analizë, siç është shtimi i obezitetit te gratë në periudhën e fertilitetit.
“Shtimi i numrit të pacienteve obstetrike në rrezik të lartë duhet të nxisë autoritetet e politikave shëndetësore për të përmirësuar qasjet ndaj trajtimeve obstetrike të specializuara, përfshirë periudhën e postpartumit, sidomos te pacientet me imunitet më të dobët,” përfundojnë autorët e studimit./Gazeta Shneta/