Më shumë kancere të gjirit po zbulohen më vonë tek gratë, duke u dhënë tumoreve një shans për t’u përhapur dhe për t’u bërë kërcënuese për jetën, zbulon një studim i ri.
Kjo rritje e kancerit të gjirit në fazën e vonë prek gratë e të gjitha moshave dhe etnive, sipas rezultateve të publikuara më 10 dhjetor në revistën “Radiology”.
“Gratë me këtë diagnozë kanë një shkallë shumë më të ulët të mbijetesës dhe janë shumë më të vështira për t’u trajtuar”, tha studiuesja Dr. Debra Monticciolo, presidente e kaluar e Kolegjit Amerikan të Radiologjisë, shkruan burimi Health Day transmeton Gazeta Shneta.
Analiza e të dhënave të regjistrit të kancerit në Shtetet e Bashkuara zbuloi se nivelet e kancerit të gjirit në fazën 4 ishin rritur:
– 2.9% në vit për gratë e moshës 20 deri në 39 vjeçe midis 2004 dhe 2021.
– 2.1% në vit për gratë e moshës 40 deri në 74 vjeçe midis 2004 dhe 2012, dhe 2.7% midis 2018 dhe 2021.
– 1.4% në vit për gratë e moshës 75 vjeçe e lart midis 2004 dhe 2021.
Shkalla e mbijetesës pesëvjeçare për gratë me kancer të gjirit të fazës 4 është 31%, krahasuar me 99% për kancerin në fazën e hershme, thanë studiuesit.
“Rritja e konsiderueshme e sëmundjes metastatike në diagnozë midis të gjitha grave amerikane dhe në të gjitha grupmoshat është një gjetje e re alarmante,” tha studiuesi kryesor Edward Hendrick, profesor klinik i radiologjisë në Shkollën e Mjekësisë në Universitetin e Kolorados Anschutz.
Dhe problemi mund të jetë edhe më i keq se sa pasqyrohet në këto gjetje, vuri në dukje Hendrick.
Gjatë pandemisë, sasia e mamografive të kryera për depistimin e kancerit të gjirit ra ndjeshëm, që do të thotë se kishte “nën-numërim të mundshëm të sëmundjes së avancuar në vitin 2020”, tha Hendrick. /Gazeta Shneta/