Simptomat e kancerit nganjëherë mund të diagnostikohen gabimisht si ndryshime normale të lidhura me shtatzëninë, duke çuar në disa raste në vonesa në trajtim, sipas një studimi të ri nga Universiteti i Surrey.
Në një studim të parë të këtij lloji në Mbretërinë e Bashkuar, studiuesit e Surrey rekrutuan 20 gra përmes organizatës bamirëse “Mummy’s Star”, e cila mbështet gratë dhe familjet që përballen me kancer gjatë ose pas shtatzënisë, dhe analizuan përvojat e tyre me diagnostikimin e kancerit gjatë shtatzënisë ose menjëherë pas lindjes, raporton Medical Xpress përcjell Gazeta Shneta.
Studimi i ri zbuloi gjithashtu se gratë që përjetonin ndryshime në gjoks, siç janë gungat, ishin më të prirura të dyshonin për kancer dhe të kërkonin menjëherë këshilla mjekësore, duke çuar në referime më të shpejta për ekzaminime të mëtejshme.
Megjithatë, gratë me simptoma më pak specifike, si dhimbjet e barkut, shpesh përjetonin vonesa në diagnostikim dhe në dërgimin për testet e nevojshme. Ky studim është publikuar në “British Journal of General Practice”.
Dr. Afrodita Marcu, studiuese në Universitetin e Surrey dhe autore kryesore e studimit, tha se:
“Hulumtimi ynë thekson nevojën kritike që profesionistët e kujdesit shëndetësor të vlerësojnë me kujdes gratë shtatzëna që paraqiten me simptoma shqetësuese dhe t’i referojnë ato për teste të duhura kur simptomat vazhdojnë. Duke marrë parasysh të gjitha mundësitë dhe duke shmangur supozimin e menjëhershëm se simptomat lidhen vetëm me shtatzëninë, mund të sigurojmë që gratë të marrin diagnozë dhe trajtim në kohën e duhur”. /Gazeta Shneta/