Fëmijët e lindur me prerje cezariane të planifikuar kanë një rrezik më të lartë për të zhvilluar leukemi limfoblastike akute (ALL), sipas një studimi të ri nga Karolinska Institutet, botuar në The International Journal of Cancer.
Studimi përfshiu gati 2.5 milionë lindje në Suedi dhe zbuloi se rreziku për ALL ishte 21% më i lartë, ndërsa për formën B-ALL ishte 29% më i lartë te fëmijët e lindur me cezariane të planifikuar, krahasuar me lindjet vaginale, shkruan MedicalXpress transmeton Gazeta Shneta.
Rreziku ishte më i theksuar tek djemtë dhe fëmijët e vegjël. Sipas studiuesve, mungesa e ekspozimit ndaj baktereve vaginale dhe stresit të lindjes natyrale mund të ndikojë në zhvillimin e sistemit imunitar dhe të shpjegojë këtë lidhje.
Megjithatë, leukemia mbetet e rrallë dhe studiuesit theksojnë se cezarianet e justifikuara mjekësisht nuk duhen shmangur, por duhet të rishqyrtohen ato që kryhen pa arsye shëndetësore./Gazeta Shneta/