Një në çdo 20 raste të preeklampsisë – një gjendje e rëndë e shtatzënisë – mund të lidhet me rritjen e niveleve të ozonit në ajër gjatë tre muajve të parë të shtatzënisë, sugjeron një studim i madh i publikuar në revistën “BMJ Open”.
Sipas studimit, nënat që vuajnë nga astma janë edhe më të prekshme ndaj këtij rreziku. Preeklampsia përkufizohet nga tensioni i lartë i gjakut dhe prania e proteinave në urinë gjatë shtatzënisë, dhe nëse nuk trajtohet në kohë, mund të shkaktojë komplikime serioze për nënën dhe foshnjën, shkruan burimi Medical Xpress transmeton Gazeta Shneta.
Hulumtimi është bazuar në të dhënat e afro 121,000 lindjeve në Stokholm të Suedisë gjatë viteve 1998–2006.
Studiuesit kanë analizuar të dhënat kombëtare për prevalencën e astmës tek gratë shtatzëna dhe kanë krahasuar nivelet e ndotjes së ajrit, përfshirë ozonin dhe oksidin e azotit nga automjetet.
Autorët theksojnë se ekziston një numër gjithnjë në rritje i provave që lidh ndotjen e ajrit me rreziqe të ndryshme për shtatzëninë, përfshirë lindjen e parakohshme. Gratë shtatzëna me astmë kanë një rrezik të shtuar për të pasur foshnje nën peshë dhe për të zhvilluar preeklampsi.
Në total, 4.4% e shtatzënive në studim përfunduan me lindje të parakohshme, ndërsa preeklampsia u shfaq në 2.7% të rasteve. Gratë me astmë kishin 25% më shumë gjasa të lindnin para kohe dhe 10% më shumë gjasa të zhvillonin preeklampsi, krahasuar me ato që nuk kishin astmë. /Gazeta Shneta/