Gati gjysma e grave shtatzëna raportojnë probleme me gjumin. Dhimbjet e legenit, pozicionimi i pakëndshëm dhe çrregullime si pagjumësia, apnea e gjumit apo sindroma e këmbëve të shqetësuara janë ndër sfidat më të zakonshme. Këto probleme shpesh përkeqësohen nga ankthi për ardhjen e foshnjës dhe netët pa gjumë që e shoqërojnë.
Ekspertët theksojnë se prioriteti i gjumit dhe korrigjimi i këtyre shqetësimeve janë të dobishme si për nënën, ashtu edhe për fëmijën, shkruan Health News transmeton Gazeta Shneta.
Barnat përdoren vetëm në raste ekstreme, pasi mund të kenë efekte të panjohura për shtatzëninë. Për këtë arsye, rekomandohen metoda natyrale për një gjumë më të mirë.
Disa prej tyre janë:
– Menaxhimi i ankthit dhe stresit, përmes teknikave të relaksimit.
– Higjiena e gjumit, duke shmangur teknologjinë, kafeinën dhe ushqimet e rënda para gjumit.
– Pozicionimi me jastëkë specialë, që ofrojnë mbështetje dhe rehati.
– Akupunktura, e cila ndihmon në rritjen e melatoninës.
– Plotësimi me magnez, i sigurt deri në 350 mg gjatë shtatzënisë.
– Aromaterapia, me vajra si livando ose portokalli (vetëm me këshillën e mjekut).
– Çaji bimor, si kamomili në sasi të moderuar, gjithmonë nën mbikëqyrje mjekësore.
Këto strategji mund të ndihmojnë në përmirësimin e cilësisë së gjumit gjatë shtatzënisë, duke reduktuar nevojën për ndërhyrje medikamentoze. /Gazeta Shneta/