Të fjeturit mjaftueshëm dhe me cilësi të mirë është thelbësor për shëndetin dhe mirëqenien, por si mund të dimë nëse gjumi që marrim i plotëson nevojat tona? Një studim i ri ka identifikuar pesë profile të dallueshme të gjumit, të cilat lidhen me aktivitetin e trurit, cilësinë e gjumit dhe faktorë të ndryshëm shëndetësorë të stilit të jetesës.
Sipas studiuesve, këto profile nuk lidhen vetëm me zakonet dhe sjelljen, por edhe me strukturën dhe funksionimin e trurit. Nëse keni vështirësi për të fjetur ose zgjoheni shpesh gjatë natës, kjo mund të ketë lidhje me mënyrën se si është ndërtuar truri juaj – dhe mund të ndikojë si në shëndetin mendor ashtu edhe në atë fizik, shkruan burimi Medical News Today transmeton Gazeta Shneta.
Studimi i realizuar nga hulumtues në Kanada dhe Singapor, analizoi të dhëna nga 770 të rritur të shëndetshëm të moshës 22–36 vjeç, pjesë e projektit WU-Minn Human Connectome.
Pjesëmarrësit plotësuan pyetësorë mbi stilin e jetesës, shëndetin mendor dhe fizik, personalitetin dhe cilësinë e gjumit, ndërsa iu nënshtruan edhe skanimeve MRI për të identifikuar “shenjat nervore” të profileve të tyre të gjumit.
Studimi i botuar në “PLOS Biology”, tregoi se çdo profil kishte model unik të rrjetit të trurit dhe lidhej me tipare të ndryshme të shëndetit mendor dhe fizik.
Sipas bashkautores, Valeria Kebets nga Universiteti Concordia, “gjumi është shumëdimensional dhe disa profile tregojnë se aspekte të caktuara të tij kanë lidhje të veçanta me shëndetin mendor apo performancën njohëse.”
Ky zbulim mund të ndihmojë në zhvillimin e qasjeve më të personalizuara për përmirësimin e cilësisë së gjumit dhe të shëndetit të përgjithshëm. /Gazeta Shneta/