Një studim i ri i zhvilluar gjatë dy dekadave, ka zbuluar se ekspozimi ndaj “kimikateve të përhershme” gjatë shtatzënisë mund të rrisë ndjeshëm rrezikun e obezitetit dhe pasojat shëndetësore. Të njohura si substanca per- dhe polifluoroalkil (PFAS), këto kimikate sintetike quhen “të përhershme” sepse mund të duhen deri në 1000 vjet për t’u shpërbërë. Ato përdoren gjerësisht në produkte të përditshme si enët e gatimit që nuk ngjiten, filli dentar dhe veshjet rezistente ndaj ujit.
Për shkak të përdorimit të tyre të gjerë, PFAS ndotin mjedisin dhe grumbullohen në trupin e njeriut, duke ngritur shqetësime serioze për ndikimet e tyre afatgjata në shëndet, raporton Euronews Health përcjell Gazeta Shneta.
Studimi analizoi 547 gra shtatzëna në Shtetet e Bashkuara, të cilat nuk kishin histori diabeti dhe kishin gjashtë lloje të ndryshme të PFAS të identifikuara në mostrat e plazmës së gjakut. Ndër to përfshihej edhe PFOS, një përbërës që përdoret për t’i bërë produktet rezistente ndaj njollave dhe yndyrës.
Pas një ndjekjeje mesatare prej 17.7 vjetësh, studiuesit zbuluan se gratë me nivele më të larta të dy prej këtyre llojeve të PFAS kishin prirje të peshonin më shumë dhe të grumbullonin më shumë yndyrë trupore.
Ky faktor rrit rrezikun e obezitetit dhe sëmundjeve kronike të lidhura me të, përfshirë sëmundjet e zemrës dhe disa lloje kanceri, theksojnë autorët e studimit. /Gazeta Shneta/